繼續同我家肥貓鬥智鬥力，佢匿喺梳化底我就買格仔板返嚟封咗個梳化底；佢走入廚房跳雪櫃，我就lock起廚房度門，今趕起身發現大門門檔被佢成條爪起，哼！咁好力信唔信我玻璃膠封住個門擋呀嗱，我係人類嚟架，哈哈哈。
同肥貓鬥智鬥力完，依家9點38分，恒指開市佢就瞓覺(今晚美股開市佢就醒架啦)，我就同恒指肥貓鬥智鬥力，今朝恒指開市升53點後，搭正9點半就向下大插，喺五分鐘圖上見到一支「大陰燭」走咗出嚟頂住成條保歷加通道頂至底，再過多五分鐘，指數繼續下行，保歷加通道口亦見拓闊，不過26000點似乎有啲支持，所以指數方面都係睇定啲先。
依家10點2分，恒指的確喺26000點附近覓得支持，推返指數上行，至依家見五分鐘圖上指數上破100分鐘線(五分鐘圖20線)，不過呢兩日恒指開局頭嗰一浸都係無乜方向，唯有向個股出發，喺聊天室上都搵到幾隻出嚟，但都係呢隻相對有信心。
早排自己都有寫過關於阿里健康(00241)，其實都見到呢隻嘢嘅日線圖殘無可殘咁滯，剛啱再見到五分鐘圖同小時圖Slow STC(14,3)都落到去超賣水平，絕對係一個觸底反彈嘅好時機。
依家10點12分，再同聊天室戰友睇多次隻阿里健康，五分鐘圖上已見Slow STC(14,3)低位回升，不過股價隨即遇上第一個關卡：50分鐘線。至於小時圖方面，則見到Slow STC(14,3)兩線處於重嚴超賣水平，但%K線都見低位回升穿%D線。
里康牛(51272)，收回價10.8元，與現價有約8.01%差距，DT嚟計都算是安全距離，呢啲殘爆嘢要捉忽然爆上並唔容易，所以唔係喺五分鐘圖上見天線就硬闖，都係用返Slow STC(14,3)落到超賣時出好倉做swing trade啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
