噚日再encore隻恒指熊(50207)，本以為恒指殺埋25500點之後會收一收手，所以(50207)都mark住喺25500點就收工。喺噚日大約1點50分見指數真係穿咗25500點之後就出支久違了嘅陽燭向上彈高，去到2點5分都仲見到指數喺100分鐘線(五分鐘圖20線)附近，心諗都真係係時侯啦，於是就喺嗰段時間掉走隻(50207)，以當時做過嘅高低位0.187元/0.154元計，平均走貨價為0.1705元，對比朝早嘅平均買入價為0.1315元，賺幅29.66%，四個字：「心滿意足」。
誰不知午後恒指愈跌愈有，反轉頭再睇原來走貨嗰位指數最後都上破唔到100分鐘線，隨時係偷位入淡倉嘅時機，見住個市一路係咁向下插，最後連25000點都無埋，最低仲見過24800幾點，全日埋單指數雖然爬得返上25000點水平，不過以總成交逾3600億元打破大會紀錄計，大成交下插呢嘢真係唔係講玩笑。
依家9點51分，奧運又傳嚟喜訊，香港隊何詩蓓喺奧運女子200米自由泳勇奪亞軍，喺香港政府對體育呢門專業幾近零資助嘅情況之下，絕對證明到香港運動員並唔係臘鴨！
再睇返個市，哼！港股就真係臘鴨啦！今朝開市升逾200點之後，一度衝升上逾300點，至依家9點58分恒指升幅收窄至升104點，報25191點，港交所(00388)同騰訊(00700)續跌，美團(03690)好返啲，升逾4%，但都仲未彌補得到始前兩日大跌(邊有咁快呀！)喺聊天室裡頭都有同戰友們講大市連插兩日，今日真係唔好心急出手，見恒指五分鐘圖目前受制於250分鐘線(五分鐘圖50線)，下方又有50分鐘線(五分鐘圖10線)同100分鐘線上緊嚟接指數，都要比多少少時間睇下恒指想去邊一邊走。
嚟到10點2分，再reload多次恒指走勢圖，見到指數已經跌穿咗條100分鐘線，Slow STC(14,3)兩線勢頭仍然向下，打算開淡倉嘅可以做定準備。
再睇埋今日恒指牛熊證街貨圖，難得一見嘅係牛熊最貼價街貨層兩者相差約2300點，無辦法，即使依家發行商推新輪證上市嘅日數比以往縮短，但以呢兩日恒指嘅急跌，點出都追唔到到佢嘅跌幅，莫講話發行商，就算比你呢兩日揀隻過千點差距嘅牛嚟捉反彈，咁插法極遠價都變貼價啦；以依家10點12分恒指做緊25058點，升轉跌28點，點計都係近下方牛證街貨，最多指數橫行或者窄幅上落唔多郁，等有新熊證追返貼現價兼儲返啲貨，同埋過埋聽日期結日再算。
嚟到10點18分，恒指似乎喺25000點想企定定，指數再次跌轉升，之前聊天室注淡倉都應該變陣反手，但又未見指數有咩動力去升咁喎，唔通佢真係打算躺平，hea過期結日就算？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
