噚日本來打算將隻恒指Put(27683)過夜，但可惜喺臨收市前15分鐘，喺恒指五分鐘圖Slow STC(14,3)根本就唔係處於超買位，反而係處於超賣水平，姑勿論呢啲位博唔博Call過夜，但以呢個走勢+swing trade嚟講，肯定唔係出Put過夜先。
不過，見到噚晚美股跌得咁高興，今朝早起身睇返新聞道指跌逾700點，心諗：唔係掛，唔通今日恒指一開波就喺五分鐘圖出超賣再超賣？結果今朝早恒指低開90幾點，至依家9點44分恒指跌幅係一度收窄，但又再次跌返去今朝開市嘅水平。Reload一下個恒指，已經又見到指數走勢再次逆轉，今次仲要轉埋燈向上倒升，但就喺五分鐘圖上見到承接噚日恒指橫行局面，50分鐘線(五分鐘圖10線)、100分鐘線(五分鐘圖20線)同埋250分鐘線(五分鐘圖50線)又聚埋一齊，Slow STC(14,3)兩線呈上中，一旦指數破得到呢個位嘅話，偷位出注好倉又何樂而不為？反之，就當遇阻將指數拉高少少之後向下彈返落去，屆時淡倉又可以出場。
呢啲咁快嘅Swing trade動作，真係只能夠喺聊天室同戰友同步睇。睇返恒指日線圖，見到指數今日仍然處於10天線以下水平，Slow STC(14,3)兩線勢頭仍然向下，換保歷加通道出嚟都見到成條保歷加通道向下運行，都係嘅，就算噚日市場上出咗啲再貼價嘅熊證，將最貼價層下移至27700至27799點，但以目前恒指現價(9點56分報27458點)，同牛證第一層27300至27399點，點計都係靠近牛證；再者新層熊證街貨裡面其實都唔係有好多期指張數喺度，預期花氣力向上殺熊，倒不如捨難取易，甚至慳返啖氣，等兩邊街貨又近又多嘅時侯，嚟個左一巴、右一巴仲抵玩。
嚟到10點7分，見到條恒指都仲未有大方向，望望窗出面又開暗過，唔通真係如聊天室戰友Kau噚日所講咁：一落雨個市都會跌？唔知道，都唔知有無人做過統計，但就幾肯定今日個市都係難玩，又試下向個股埋手。
睇返新聞話噚晚美股跌逾700點係因為市場擔心(又擔心？)經濟復甦步伐減慢(是但啦 -_-)，所以資金湧晒入去金市避險，SPDR金ETF(02840)今日彈得咁高就係咁解；同步又話啲油價下跌，所以今日油股孖寶又做得咁鬼肉酸，二選一嘅話個人傾向中海油(00883)，無他，純綷情意結。
日線圖見中海油Slow STC(14,3)已經出現超賣再超賣，而且兩線目前已落到5或以下嘅極底水平，今日仲要見到裂口下挫，依家10點17分，中海油最低暫時做過7.7元，爭3格就同4月8日近期低位7.67元睇齊，咁大條「下降通道」，咁殘嘅Slow STC(14,3)，仲要由五分鐘圖至小時圖嘅Slow STC(14,3)都同步咁殘，可恨未見Slow STC(14,3)出現觸底回升，如果唔係都想出隻Call博一博，唯有執定隻海油牛(69754)，收回價7.3元，同現價有逾5%差距，約10倍槓桿，唔好企咁近安全啲。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
