噚日同我家老爺去到一個領養貓貓嘅活動，一早都有啲打算係諗住領養一隻貓貓喺屋企，無他嘅，我同老爺都想屋企多啲生氣，只係擔心我哋兩個會無時間陪佢，所以一直都將件事放喺心度，仲打算「不如退咗休之後先再考慮啦」，但老爺就話「你肯定到時我哋仲有心有力可以照顧到一隻貓？」主人嘅角色係做一世，你嘅世界可能仲有好多嘢，但寵物跟咗主人之後，佢嘅世界就只係得主人一個，所以本打算以一個「見識下」嘅心態去，結果填埋領養紙，返到屋企仲喺度左度右度搵個地方安置貓貓。不過去過「領養日」嘅朋友都知道，機構會幫貓貓盡力做100%嘅配對，如義工小姐所說「唔係你唔適合，只係可能有其他更適合貓貓嘅地方」。不過見到一班義工好幫手，真係要多謝佢哋。Anyway，隨緣。
依家9點49分，完咗U盤見到恒指跌逾200點開市，報27786點，首層牛證27800至27899點都全數死亡，不過由於呢層係新增街貨層嘅關係，所以都只係得廿零張期指嘅街，但由於U盤後都見到恒指點數近下方牛證，再加上由五分鐘圖至小時圖Slow STC(14,3)都係向下中且未到超賣，所以都早早叫定聊天室戰友吼定淡倉。到依家9點51分，已見恒指跌幅擴大至跌逾400點，今朝開搶到淡倉嘅戰友又可以淡淡定去嘆個早餐先啦。
喺聊天室呢期多數都係一注獨贏，仲要係晨早開市搶貨揸至中午收市前收工，對我嚟講無乜所謂，反正方向啱出到注有收獲就OK。有戰友話「下雨天總是跌市」，係喎，一號波仲未落喎。
睇返恒指日線圖，上個星期咁辛苦咬得返上28000點收市，今日Boom一聲就無咗，反方向向下插，10天線得而復失，就連Slow STC(14,3)都喺中軸水平見%K線穿%D線。睇返恒指牛熊證街貨圖見26800至26899點有相當於1245張期指，為牛證重貨區。「唔係連27000點都想穿呀？」唔係，你 怕今日又幾百點咁向下跌法，啲錢仲唔湧入去貼價牛博第二日再炒返上去咩，依家最貼價27500至27599點牛證層有逾400張期指。又落一浸雨，行去閂埋少少隻窗再返嚟見指數好似無乜意欲彈高，截至依家10點10分，噢，Day Low暫時最低做過27481點，換言之最貼價層落到27400至27499點，開市一個鐘都唔夠大市又殺咗逾900張期指街貨。
嚟到10點15分，小時圖都出咗今日第二粒燭，見到指數走勢同Slow STC(14,3)都係向下，而且保歷加通道口明顯拓闊。即比位恒指向下走；再加埋日線圖又再次受制於10天線(27786點)，恒指Put(27683)，行使價27468點，10月28日到期，屬輕微價外Put，低引伸、槓桿適中，五分鐘圖等Slow STC(14,3)上返嚟嘅話怕且都要等到下半場先有可能見到，又試下等到五分鐘圖保歷加收窄咗之後嘅話，會唔會撞得到天線遇阻之後再落，就吼嗰啲位入啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
