噚日隻恒指熊(54250)去到下半場都見到指數一直keep住向下走，喺去到3點打後有一下回咗上去保歷加通道中軸以上水平，不過，以噚日嘅入市位嚟講，估計(54250)都有一定嘅水位；假設噚日下半場你選擇沽一半留一半的話，再以小時圖Slow STC(14,3)落到超賣作食胡準則，今朝開市彈百零點可能有啲嚇親，但到依家9點59分，都無咩好驚啦下話。
猶記得唔知幾時曾經有喺恒指日線圖畫過一個大型「楔形」出嚟，見到恒指當時處於大型「楔形」裡面游走，依家再睇返恒指日線圖，大型「楔形」仍建在，計及截至依家10點5分恒指連跌三個交易日，第一日開波跌嘅係星期一(6月28日)，而呢一日剛好指數上到大型「楔形」頂部，同時Slow STC(14,3)兩線上到超買水平，其後見回落，你話技術分析顯靈又好，高位遇阻都好，乜都好，只係估唔到大型「楔形」會贏得過七一國慶前夕。
「下？真係見住紅嚟過七一呀？」望埋恒指牛熊證街貨圖你就明架啦。今日牛熊街貨兩邊都無新增層數，牛證最貼價層為28800至28899點，有相當於571張期指；至於熊證最貼價層為29400至29499點，有相當於701張期指，中間位就即係(29400+28899)/2=29149.5點，以依家10點19分，恒指報29000點計，數值上的確仍然向下方牛證，如果按一般取易捨難嘅方向走的話，指數下行真係有佢原因。
回帶再睇返恒指五分鐘圖，同聊天室戰友等咗差唔多一個鐘，終於都見到指數約10點到做過低位28914點後回升，但由於見到五分鐘圖上50分鐘線(五分鐘圖10線)、100分鐘線(五分鐘圖20線)同250分鐘線(五分鐘圖50線)好近，三線匯聚之下出淡倉爬格仔博指數向下行殺牛證街貨，恒指熊(68807)，收回價29450點，同現價有逾460點差距，街貨14.5%向來都不是我杯茶，不過見槓桿係同一收回價中最高嚟講，DT就算啦，唯一擔心嘅係小時圖條Slow STC(14,3)向上走返上去，所以捉定多隻恒指牛(53635)，收回價28500點，同現價有逾480點差距，小時圖真係見到Slow STC(14,3)回升的話，就出手啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
