有人話雨後會天晴，不過今朝早出門口時個天仲有陰陰的，睇新聞時見右下角loop住嘅日經跌200幾點，今朝早恒指輕微高開之後，依家9點46分已見回落，不過reload一下個圖之後，指數又再次掉頭向上。
噚日因黑雨關係所以無【輪證贏家】，但11點幾黑雨變返紅雨，所以【輪證下半Part】照常營業，都由於噚日得不足半日市嘅關係，所以都無向指數埋手，反而向阿里(09988)招手。
睇返噚日嘅部署，揀咗隻阿里Put(22179)出嚟，策略上打算喺五分鐘圖見阿跌穿50分鐘線(五分鐘圖10線)爬唔返上去就出手，出文嘅時候的確有見到阿里股價失守50分鐘線，但後來股價好快爬返上去，其後以貼住50分鐘線/100分鐘線(五分鐘圖20線)橫行，直至收市。而(22179)都係得個「揀」字，根本就無一個位可以落到場。
既然睇開阿里，就繼續睇返佢先。噚日都有講過喺日線圖上見阿里高位未能上破100天線，同步見Slow STC(14,3)有高位向下回落之嫌，今日再見，截至依家9點59分止，阿里股價暫呈「十字星」(隨時一陣cap圖又變咗第二個樣)，只不過今日見保歷加通道口繼續拓闊，似乎阿里要喺呢個位徘徊一陣咁喎，都係等Slow STC(14,3)%K線確認高位跌穿%D線先出淡倉。
手畫地圖教完老媽點樣行去我平時睇開嗰牙醫後，再睇返恒指，見指數開始沿住，還好喺五分鐘圖未有咩走勢睇到嘅時候，喺聊天室同大家講咗試用小時圖去出淡倉，如今應該問題不大。
嚟到10點17分，小時圖見指數完全失守於10小時線(小時圖10線)之下，恒指熊(54250)，收回價29528點，同現價有370點差距，47倍槓桿適合Day trade使用，進取嘅就等指數喺五分鐘圖上破唔到條50分鐘線再見回落之後先出啦；安全嘅就可以用返一如以往嘅策略，等Slow STC(14,3)上返去超買位時就落場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
