明明出門口個天都仲係好地地,一落地鐵大雨到好似黑雨咁,行到返嚟下半身都幾乎濕透,一陣仲要早啲出門口過海,麻煩...
依家9點53分,今朝恒指高開,重上29000點水平,到依家見指數稍為回落,Slow STC(14,3)都見到有掉頭嘅情況,不過,以恒指目前水平係近上方熊證街貨第一層29000至29099點,而呢度都有相當於587張期指;反觀下方牛證今日見到有三層新增街貨層,最貼價上到去28700至28799點,但由於新增嘅關係,所以只得100張都唔夠嘅貨喺度,再加上小時圖條Slow STC(14,3)雖然由噚日開始到依家都係處於超買範圍,但見今日條保歷加通道整體向上嘅同時,頂線都有向上翹嘅情況,指數再上行的確唔出奇。
睇返噚日隻恒指牛(53918),喺噚日今朝早11點20分至11點45分,見Slow STC(14,3)回落至20以下超賣水平後,將(53918)落場,按當時(53918)高低位做過0.042元/0.04元,平均買入價為0.041元。
喺下晝嘅時侯見到證價都唔係太郁,本來諗住再等Slow STC(14,3)呈上之後先至再吼位走貨,不過等到3點20左右,喺五分鐘圖上見到指數跌穿保歷加通道中軸水平,原以為可以靠窄窄的保歷加通道挾住指數唔好跌得太多,誰不知呢個如意算盤打唔響,Slow STC(14,3)順勢向下殺返落去超賣範圍,再去到臨收市前20分鐘,Slow STC(14,3)終於回升返上去,去到呢個位,過唔過夜都真係要博一鋪,事關收市15分鐘計,(53918)證價同平均買入價都係多平均兩格到,若然你揸到今朝一開市見上到29000點水平而走的話,呢一趟過夜平均袋到有十格八格,都尚算唔錯呀。
嚟到10點8分,睇返恒指五分鐘圖見指數keep住喺29000點附近游走,50分鐘線追得上指數附近,然而喺呢個高位作勢見到「圓底」嘅物體,破到頸線的話真係隨時再向上追斬堆29000至29099點嘅熊證街貨。
恒指牛(53878),收回價28550點,同現價有逾450點差距,逾67倍槓桿夠DT用,進取嘅可以以五分鐘圖上破頸線為追升入場,安全嘅當然可以等返條Slow STC(14,3)冷靜下先啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
Facebook:https://www.facebook.com/cbbcwar
秒投聊天室:https://bit.ly/31HG6AN