美股道指連升五日後，隔晚因為美國ADP私人職位增長好過預期，市場再度敲響擔心加息嘅憂慮，道指連升斷纜，一度隊215點，但拜登出發G7會議前，突傳出放棄將企業稅率提高到28%，轉而至企業稅率最低至少要15%，道指一度拗腰回升，全日仍要跌23點收市。
美股彈唔起，因為呢單根本喺舊聞。財長耶倫早於5月21日已建議，全球企業最低企業利得稅率應設於15%或以上，目的喺避免國與國爭先將稅率降至更低水平，並以15%為紅線，而拜登出發G7開會前突然再放此消息，只喺為談判鋪路，故美股彈唔起實屬合理。
留意今晚八點半
近期美股走勢似走弱，雖然道指與標普五百企在偏高位，但納指(圖一)走勢麻麻，加上14天RSI似有背馳，若果質穿20天線(現處13520)，納指將進入劣勢，下試保力加通道低位，即13092，即比上日有3.8%潛在跌幅。
至於咩事觸發調整，或會喺今晚兩粒經濟數據，包括失業率及非農新增職位。市場估5月失業率會降至5.9%，非農職位則升67.4萬份，萬一數據好過預期，市場會解讀聯儲局縮表在即，即喺大市會有一輸沽壓，若果差過預期，即是央行放水會持續，股市派對依然有得玩，而呢兩粒數將會在今晚本港時間八點半公布。
昨晚ADP粒數好強，連帶美滙也抽起，質低人民幣，美滙抽升也波及金價，隔晚金價質穿1900美關，今早更一度挫至1856美元，咁啱就喺近期上升軌附近，若果失守上升軌(圖二)，金價可下試1800美元，而金價短期走勢便要睇今晚八點半公布的失業率及非農新增職位，呢兩粒大數。
全球車股炒上
近期中美汽車股突然爆升，包括美國上市的內地新能源車股小鵬汽車(XPEV)、理想(LI)及蔚來(NIO)，升得最誇張喺契媽股Workhorse(WKHS)，此股連升三日，前日大升19.5%，上日一度更大升六成，收市再升28.2%，原因喺沽空旺，散戶又再起義挾爆佢，情況如GME一樣。
撇開Workhorse，汽車股炒上主要有兩個消息，第一是內地Tesla在內地訂單劈半，其次為福特(F)5月電動車銷量大升1.8倍，帶挈福特與通用汽車(GM)大升7%和6.4%，Tesla隔晚則插5.3%。
電動車喺大勢所趨，但市場競爭會越來越激烈，Tesla早前贏一條街，但神車五菱宏光mini爆紅，Tesla中國銷售也開始轉弱，加上蘋果(Apple)、小米(01810)、百度(09888)也進軍電動車，還有傳統汽車公司發力步步進逼，誰勝誰負都好難估。
雷軍突到訪上汽通用五菱
現市買上游汽車零件股比汽車品牌股好，正如寧德時代(300750.SZ)，每間車廠都要揾佢買電池，港股扒冷可揀五菱汽車(00305)，一來供貨比同系公司上汽通用五菱生產五菱宏光mini，二來五月底時有網民影到，小米董事長雷軍突然到訪上汽通用五菱，未知是否為造車鋪路，但絶對有無限遐想。
不過，擔心美股調整在即拖累港股，五菱要吼低位1.7元樓下先好買入，目標暫睇2.5元，跌穿1.5便要講分手。
海外方面，有兩間公司值得留意，一間是日企兼供電動摩打比吉利(00175)及廣汽(02238)，並可在美股買賣，將留待下周三本欄再講，另一間更有睇頭，傳大有機會幫蘋果公司砌車，呢隻股份將會留待在下周二《信報》「美股歷奇」介紹比大家。
作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文，另每逢周二在《信報》撰寫「美股歷奇」。
（編者按：信報分析團隊羅崇博、尹德政、陳鎮強最新著作《勢在必行：活用全方位價值趨勢信號》現已發售）
歡迎訂購實體書 電子書：https://bit.ly/ejbook141
