噚日下晝未到3點，恒指無啦啦發力向上，五分鐘圖仲上破保歷加通道中軸，之後仲起勢咁去，「谷針」順便「谷市」，哼，你都得架啦！不過都唔緊要，好在老娘Mark住噚日恒指五分鐘圖都keep住喺保歷加通道中軸至底部運行，佢忽然爆上，仲要保歷加通道同拓闊，恒指Put(25730)都係收埋先，人類係唔會重複犯錯架！
今朝起身個天都黑晒，原來出咗黃雨，本以為恒指微升嗰7點開市，連個市都黑埋，還好依家9點52分，喺恒指五分鐘圖上見到指數開市後回一回，落到保歷加通道中軸後再見彈升，依家重奪29200點以上水平。呢條路係啱嘅，事關以恒指噚日(5月31日)計，抑或以今朝開完U盤嗰開市價計，點都係近上方熊證，呢點喺聊天室都有同戰友分享。
截至依家9點57分，恒指最高見過29231點，叫做踩住熊證第一層街貨29200至29299點，只係呢一層嘅街貨就只有1張期指咁大把，喺走勢圖上見指數依家再度回落，SlowSTC(14,3)同步下行，明白嘅，個市始終都唔係一口氣向上，以一浪高於一浪嘅形態向上走嘅話，感覺健康啲，至少快手捉Swing Trade嘅day Trader都仲有得玩。
策略上，先計恒指牛熊證街貨圖中間位(29200+28999)/2=29099.5點，再以截至依家10點3分恒指做緊29167點比較，現價仍然近熊證街貨；再以兩邊各五層最近街貨相對期指張數比較的話，熊證2015張期指完勝牛證1061張期指。
恒指牛(65715)，收回價28800點，同現價有400點差距，槓桿為同一收回價之中最高，達73倍，17.15%街貨對DT嚟講，It doesn't matter；反而擔心嘅係，五分鐘圖裡面恒指有無第三次機會落返去50分鐘線(五分鐘圖 x 10線)或100分鐘線(五分鐘圖 x 20線)，甚至係SlowSTC(14,3)落返去超賣水平比位去小注入呢隻牛證呢？
BTW，小心五分鐘圖「頂背馳」嘅出現。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
