噚日成日焦點應該都係新垣結衣同星野源宣布結婚呢單嘢，相信大家都被呢條新聞洗晒成個FB版面，戰友仲share咗一個「論日本明星結婚對股市的衝擊」圖表，「國民老婆」到底對日經有幾大影響？Well，我今朝起身睇新聞至出門口前見日經由跌轉升，反而港股有事，係咪代表日本嘅男士接受咗「新郎不是我」，但香港嘅男士仍然都係「Mola Mola」mode？不過，我嘅焦點落咗喺姜濤同日本AV女優中尾芽衣子「撞樣」呢單嘢，真係可以笑半日。
依家9點49分，今朝喺地鐵時見到指數做完U盤，跌180點，到正式開市後跌幅一度擴大至跌逾200點，但至依家都見指數跌幅收窄，SlowSTC(14,3)喺五分鐘圖上回落到接近中軸水平後回升，不過，小時圖SlowSTC(14,3)處於嚴重超買位%K線高位穿%D線向下回落，所以都有叫定聊天室戰友，如果用小時圖追跌的話，留意住條100小時線，以止作為止蝕水平。
恒指跌幅收窄，應該都歸功於隻騰訊(00700)，事關今日收市後騰訊將會公布今年首季業績，例牌騰訊績前都有唔少資金買定好倉，等收市後公布業績，博聽日爆上然後走一趟。
依家10點5分，喺恒指五分鐘圖見指數上到50分鐘線(五分鐘圖 x 10線)之後遇阻回落，聊天室戰友今朝開咗淡倉嘅嘅話都真係可以鬆一口氣。
再睇返恒指小時圖，過咗10點小時圖就會見到第二支燭，見指數仍然受制於10小時線以下水平，SlowSTC(14,3)都Keep住勢頭向下。
恒指熊(57927)，收回價28940點，同現價有近500點差距，DT嚟講呢個距離算安全，槓桿比率逾36倍，用小時圖「菢蛋」的話，以升穿100小時線做止蝕。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
