上個星期五(5月14日)同幾位朋友食lunch，難得第一次見面嘅小聚，真開心；其中兩位仲要係觀塘友，喂！隨時食lunch叫埋我，其實我可以食得好地踎，廣場啲車仔麵檔我都OK架；一陣同舊場班同事食飯，又係另一個期待，不過條街好鬼熱。
今朝早未開市收到alert話壹傳媒(00282)停牌，到開市後毛記葵涌(01716)就爆咗上去，明眼人都知係另一種「控訴」。
依家9點51分，恒指做完U盤升100零幾點之後繼續去，唔難估到，事關開市前見恒指五分鐘圖SlowSTC(14,3)處於中軸水平，先係兩邊都有機會走；其次再睇埋恒指牛熊證街貨圖，以上星期五恒指收市價同街貨圖比，的確係近上方熊證，粗略推斷上行嘅機會較大。
及至開市後見五分鐘圖SlowSTC(14,3)都未上到最盡，即係話指數仲有得去啦，如是者都有叫定聊天室戰友快手的話可以追好倉。
至依家再睇，五分鐘圖SlowSTC(14,3)兩線已經上到超買至嚴重超買範圍，本身有貨嘅可以再等多一陣，睇下條50分鐘線(五分鐘圖 x 10線)會唔會做指數嘅踏板，將恒指再推返上去；如有，恒指牛(56364)，收回價27700點，同一收回水平及換股比率中，槓桿最高，適合Day trade。安全嘅當然可以吼五分鐘圖SlowSTC(14,3)落返去超賣位時先至進場啦，問題只係要留意稍後保歷加通道會否好似之前咁，11點到就開始收窄，指數準備收工咁樣。
繼續跟進隻恒指Put(22380)，上個星期收市價落返去$0.213，對比上星期二(5月11日)嘅平均買入價$0.2165，幾近打回原形。一個星期過去，睇返恒指周線圖，今日指數升接近200點，(22380)開始入肉但未算好金(打算擺咁長而輸10%都未到嚟計)，只不過指數仍然處於保歷加下降通道範圍，問題在於保歷加通道口有收窄嘅情況，如果以目前週線圖計，以下望保歷加通道底(27577點)做目標的話，希望今個星期達標啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
