作為新一代賭波界燈神嚟講，小妹實在當之無愧；正當我噚日斥資買曼聯贏嘅時侯，今朝起身我家老爺同我講：多謝你呀！曼聯2:4利物浦呀！Well，呢啲時候梗係同我家老爺Claim返條飛啦！作為一個利迷，你唔係唔找數呀？知我咩料啦？
今朝睇新聞見噚晚美股同日經都做得唔差，見到恒指牛熊證街貨圖最貼價嗰證牛證27700至27799點都有成300幾張過夜貨，都反映到市場預期恒指噚日大插後今朝會高開；比呢班友仔博到啦。
依家9點56分，恒指高開後喺五分鐘圖上見「射擊之星」後下行，跌幅大為收窄至依家81點，做緊27799點，以暫時低位27715點計，第一層牛證其實同死晒都真係無分別，喺恒指五分鐘圖上見保歷加通道有輕微收窄嘅情況，再加上恒指現價靠近下方牛證街貨，而且牛證街貨貨量多於熊證，照計數點都會向下行殺重貨掛。
指數今日似乎唔係好搞得佢掂，於是向個股埋手，啲ATMX真係弱過雞，再向其他方向發展，搵到隻網易出嚟，睇中嘅係佢條小時圖，依家10點11分見到網易小時圖上SlowSTC(14,3)兩線處於20以下嘅超賣水平，可惜未見%K線喺低位升穿%D線；陰陽燭圖上見暫時呈「身懷六甲」，屬轉勢訊號。
反轉頭再睇網易五分鐘圖SlowSTC(14,3)早在9點50分至10點時低位回升咗，依家上破埋50分鐘線(五分鐘圖 x 10線)，美中不足嘅係整條保歷加通道有向下之嫌，追小時圖向上嘅話可以先等等五分鐘圖回一回先追入。
網易Call(22233)，行使價$163.88，8月中到期，成交活躍、低街貨、槓桿同引伸都適中，好少揀呢間發行商嘅輪，不過成堆Call望上去都係得呢隻條款最吸引，反正發行商都唔係揀輪嘅首要條件，最重要都係本身條款啫。
至於隻恒指Put(22380)，輪價依家(10點19分)做緊$0.227，未死得，繼續hold。
今日下晝約咗聊天室其中三位成員lunch time聚餐，三位當中有兩位係第一次見面，有啲期待；由於時間約得比較晏，所以今日嘅【輪證下半Part】會早少少出現，費事趕住食完打隻稿，破壞難得一聚嘅雅興。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
