噚日集氣成功！失落咗隻平保(02318)Call(23665)，竟然喺恒指牛(67062)到復仇！人貪心本來想再儲肥啲，不過，喺打緊噚日隻【下半Part】時，見恒指五分鐘圖回落返去保歷加通道中軸附近，SlowSTC(14,3)都開始下行，為博嘅就只係中軸有力將佢推返上去，結果今次貪心鬼行動成功，指數係3點打後再展開新升浪，以SlowSTC(14,3)於80以上超買位作為沽貨目標的話，喺下晝3點10分至3點25分就已經見到，以當時(67062)高低位$0.041/$0.038，平均價為$0.0395，呢轉DT平均賺幅為36.21%。
明明贏錢但呢排失去咗以前嗰種興奮，呢排已經唔係好瞓得，近兩夜仲興半夜醒咗；噚晚醒咗嗰時咁啱羅馬VS曼聯，我家老爺本來噚晚叫我買羅馬贏或者和波，賠率高嘛，但就覺得無理由曼聯會輸呀？醒咗一個人喺廳時開馬會個app見羅馬0:1曼聯，羅馬贏個賠率仲由3.X倍瘋到上14.X倍。到今朝起身睇新聞見羅馬3:2曼聯...波真係圓嘅。
睇返今日恒指，今朝早見恒指街貨圖時都仲有捉得到恒指大概個方向，直至到開市之後見指數再上，心諗：向上殺熊都要捱得返上29000點先至叫做多啲肉食，但說好的「五月窮」呢？避開人群走後巷行返新場，發現後巷都有唔少好靚嘅Graffiti，thank you #thebackstreet，暗地為呢個沉悶嘅觀塘帶嚟值得停留嘅一刻。
嚟到10點17分，恒指五分鐘圖上出過「墓碑十字星」後失靈再上，至依家終於都見到回調嘅一刻，50分鐘線(五分鐘圖 X 10線)剛剛跌穿，SlowSTC(14,3)勢頭向下，喺聊天室同各位戰友講定DT淡倉策略，換上遠少少嘅10分鐘圖都見有高位回落嘅跡象，恒指熊(54211)，收回價29172點，換股比率為20000，所以你會覺得好慢，但勝在有約46倍槓桿。
放低多隻可以做反手嘅恒指牛(58216)，收回價28300點，同現價有逾500點差距，約58倍槓桿都好吸引，真係見五分鐘圖落過50分鐘線後死咬唔放+SlowSTC(14,3)鬼鼠地轉勢就落場，DT用。
未夠手快嘅，就僈慢地觀察。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
