噚日臨收市前見到恒指跌幅收窄，再望望隻平保(02318)都見有少少彈返上去；再加埋噚日喺屋企打機食咗鋪十三么；再再加埋今朝起身睇新聞時，右下角loop住日經升過300點(出門口時見到升逾400點添)，心諗：咦？好似返番嚟咁喎...隻平安Call(23665)應該無死掛，點都會捱得到過去啦。
不過，一到U盤時見到隻平保見紅，即刻喺聊天室大嗌「平保擁抱區」，好彩最後U盤完咗都見平保係隨大市上行，至依家9點50分，開機見到平保都仲keep住個升勢，暫時仲有條保歷加通道中軸同50分鐘線(五分鐘圖 x 10線)頂住，SlowSTC(14,3)喺10點至10點5分上到60以上之後都無乜力度，其後勢頭向下；Well，(23665)喺嗰段時間走嘅話，以當時高低位$0.148/$0.146計，平均價為$0.147，對比噚日平均買入價$0.15或$0.1475(因為有兩個位可以落場，簡化啲將呢兩個價再拉個平均數嚟計，即$0.14875)差唔多；八掛睇埋小時圖，嘩！條保歷加通道中軸頂到好行，都係舉白旗算啦。
再睇返今日恒指，都算叻仔，最大可能係因為今日有返北水，不消半個鐘恒指升幅略為擴大至逾300點，做緊28730點，以今日所見嘅恒指牛熊街貨圖計，指數重返熊證街貨範圍，熊證第一層為28700至28799點，有相當於240張期指。
咁搶高法，恒指五分鐘圖SlowSTC(14,3)唔難估都知搶到上超買，甚至係嚴重超買水平；拉遠少少望小時圖，其實都見到指數今日已經頂住保歷加通道頂，還幸SlowSTC(14,3)兩線處於中軸至超買水平，且勢頭仍然向上中，偷高位出淡倉係可以，但小心五分鐘圖50分鐘線上緊嚟接住恒指，一踩又彈(好歹恒指都連跌兩日呀)，安全嘅等恒指五分鐘圖條50分鐘線上到嚟之後，見有支持見至出手都唔遲，反正恒指日線圖今日見指數重上100天線+SlowSTC(14,3)勢頭明顯上行+噚日都算低位出咗「十字星」。
恒指牛(67062)，收回價28228點，同現價有逾500點差距，近60倍槓桿雖然唔係特別高，但勝在低街貨兼成交活躍，DT嚟講都夠用啦。唯一要留意嘅係恒指再去，日線圖上就有10(28814點)、20(28804點)、50天線(28907點)嘅三線阻力啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
