每年生日都係平平淡淡咁過，或者年紀大掛，但係今年有少少唔同。話說一早起身已經見到一堆「生日快樂」嘅Whatsapp，其中一個係我中學同學(年輕人，阿姨以前中學係有淘汰試，所以呢個同學真係去到中三就Bye)，咁多間年斷斷續續都收到佢「生日快樂」Whatsapp message，你仲記得當年日見夜見嗰班同學嘅生日嗎？Surprise no.1。
今日嘅message佢仲爆比我知原來佢老早就估到我係呢個專欄嘅作者，仲follow咗個FB page，只係憑我嘅文筆同埋寫嘅嘢，再加埋偶爾間爆咗另一個中學同學嘅生日，如是者就「化咗灰都認得你」，多謝你，Fila，為我今年平淡嘅生日增添一份莫名奇妙嘅喜悅；約定我返觀塘、你返牛頭角嘅Lunch飯局。
依家9點27分，恒指做完U盤，開市報28991點，升50點。喺五分鐘圖上見指數已經飆咗上太空，SlowSTC(14,3)都上到去超買至嚴重超買水平，都係等開市後指數縮一縮再度過。
嚟到9點50分，恒指高開低走一度見紅之後又再爬返起身，喺五分鐘圖上發現指數今朝下行時，好淡雙方各自出咗支大燭嚟爭持，一爭之下就生咗「身懷六甲」出嚟，於是指數再飆咗上去。
6分鐘後29000點失而復得，唔知稍後時間會唔會再得而復失(煩死)，但見到嘅係SlowSTC(14,3)已經進入超買水平，day trader留意啦，SlowSTC(14,3)一上到超買位而指數高位轉勢陰陽燭形態嘅話，淡倉隨時出動；同樣地，如果指數喺五分鐘圖回落至最接近天線位時有支持的話，隨時反手。捉浪炒上就係要咁反嚟反去。
噚日有提過下隻藥明(02269)，都有講過如果佢收市收唔返上10天線嘅話，就唔好怪人開佢淡倉啦。
坦白講呢期市場咁多配股套現嘅動作，擺到明就連老細都對後市投下無乜前景嘅一票，又何需同佢客氣？求財啫。
依家10點9分，藥明今朝股價隨市上行，五分鐘圖上保歷加通道都有見到拓闊，所以連帶日線圖今日都見到有上破10天線嘅跡象。
不過去到呢個鐘數就見到股價上到500分鐘線(五分鐘圖 X 100線)，股價出「十字星」兼SlowSTC(14,3)兩線處於90以上超買位作勢回落。藥明熊(56714)，收回價$118.8，同現價有逾9%差距，市場上最貼價嘅熊證，So far都係得呢隻有成交，證明I am not alone，小注試試水溫好啦，一陣恒指失心瘋飆咗上去，帶埋佢一齊走就麻煩啦。
The last but not the least，一早起身收到來自四方八面嘅祝福：屋企人、朋友、舊同事、聊天室嘅戰們、舊公司嘅豬仔會...生日快樂！新工順利！全數都收到啦，多謝！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
