放完兩日假，又到咗星期一不想努力症候群出現嘅日子，不過，望望月曆見到今個星期五(4月2日)開始一連五日嘅清明+復活節假期，即係今個星期返四日，下個星期返三日，個人又醒咗一陣。
依家10點12分，恒指今朝低開19點之後，一段向下殺至接近跌200點，不過依家轉燈，倒升130點，做緊28467點。今朝喺聊天室上我都有少少舉旗不定，本身話等恒指五分鐘圖SlowSTC(14,3)回升時出好倉，但到正式開市後見到恒指急插，個心又怯怯地喎，喺乜都無追嘅情況之下見住恒指倒升過百，都無乜嘢嘅，慣咗啦；呢個故教訓我凡係見到出手時機都唔好猶疑，Just do it！
望返上個星期五(3月26日)喺【輪證下半Part】揀咗嘅小米Call(13010)同恒指Call(20112)先。
上星期五喺下半場2點45分至3點15分都見小米五分鐘圖SlowSTC(14,3)落到超賣水平，按當時(13010)高低位做過$0.141/$0.129，平均買入價為$0.135。呢啲鐘數買入都預咗過weekend，今朝小米股價隨恒指開市向下un咗一un啫，無見大裂口嘅情況之下再隨大市回升，上到大約10點15分至10點26分到，見小米五分鐘圖SlowSTC(14,3)回升至超買水平，唔貪心呢個時候沽走(13010)的話，按呢段時間(13010)高低位做過$0.152/$0.145，平均沽貨價$0.1485，即平均賺幅剛好為10%。
至於隻(20112)，上星期五都喺下晝2點55分至3點10分左右，見恒指五分鐘圖SlowSTC(14,3)落到超賣水平，同樣地呢個時候可以將(20112)落場，以當時(20112)高低位$0.127/$0.125計，平均買入價為$0.126。
持貨至今，截至依家10點32分止，係捱咗一下今朝恒指低開之後，喺五分鐘圖上已見恒指重拾升勢，且動力比小米強，即使於今早10點10分至10點20分出過「黃昏之星」，不過，回落過後恒指再踩住50分鐘線(五分鐘圖 X 10線)上行，喺聊天室都有叫定戰友入返好倉，主要都係睇返恒指現價近熊證街貨+博日線圖嘅「早晨之星」+臨近季結，或有驚喜。
無貨嘅話吼恒指五分鐘圖落返50分鐘線或100分鐘線(五分鐘圖 X 20線)見有支持彈高的話可以出恒指牛(55583)，收回價27768點，同現價有逾400點差距，逾51倍槓桿都知道係day trade嘢啦。
若果恒指狠狠地下殺呢兩條線的話，莫講話隻(55583)，就連(20112)都要走人為上。
記住，睇啱嘅話，Just do it！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
