噚日揀咗隻快手(01024)出嚟，一Call(23539)一Put(22406)，先係喺1點35分至1點45分，見SlowSTC(14,3)重上80以上水平出(22406)，其後去到2點零時見到SlowSTC(14,3)再次回落返，不足一小時就有平均3.2%嘅賺幅；都有講底過之後如果喺五分鐘圖見到SlowSTC(14,3)確認轉勢嘅話就可以出(23539)。
如果繼續跟住呢策略去玩嘅話，咁喺2點35分至2點45分，見SlowSTC(14,3)喺此前嘅超賣水平回升，(23539)真係可以落場，當時輪價為$0.126。及至下晝3點20至3點25分，快手五分鐘圖SlowSTC(14,3)再次重返超買水平，惜輪價唔多郁，喺3點20分至3點25分見SlowSTC(14,3)踩入80以上水平，但(23539)都只係做緊$0.127/$0.128，沽走的話和咗個手續費；唔沽揸到依家10點14分見$0.135嘅話，都有六格落袋架！點都好，呢一注應該點都唔會輸。
返番嚟睇今日恒指，依家10點22分，同事阿Jo男友又買咗隻Hello Kitty朱古蛋比我，多謝先！中咗「我最想要系列」嘅其中一隻，不過係重複嘅，哈哈！KO完隻蛋之後見恒指由今朝微跌開市，到正式開市之後一度跌逾200點，將牛證第一層街貨28800至28899點殺晒，咁又唔多貨嘅，得85張期指咁大把；行開去搵完老細傾咗陣嘢再返嚟，咦？乜轉埋燈倒升啦？
「五分鐘圖做swing trade真係太快啦！」Well，今朝就喺用咗小時圖博佢唔過保歷加通道中軸，先叫聊天室戰友們出恒指熊，結果就瀨咗嘢；不過，依家再睇返個小時圖，企得穩喺保歷加通道中軸以上水平喎，條SlowSTC(14,3)又keep住勢頭向上。
恒指牛(52898)，收回價28550點，同現價有逾500點差距，槓桿逾50倍，適合day trade，以小時圖繼續向上為目標，但吼五分鐘圖SlwoSTC(14,3)落返去超賣為買入靚位。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
