個人就頹咗幾日，不過個腦就無頹到，仲chur得行得滯，差啲好似條橡根咁斷咗；經過星期六老媽叫我返娘家打咗幾圈麻雀，食咗兩鋪八翻之後，頓時有一種「我返嚟啦」嘅感覺。老媽把口就話叫我陪下佢，但其實應該係你陪我，多謝阿媽！
依家10點9分，恒指已經上逾400點，最高暫時做過29718點，不過，今日見恒指街貨圖，熊證最貼價層為29500至29599點，仲要走剩得17張期指咁大把。喺恒指日線圖上見今日暫時叫做升穿過10天線(29079點)，但下晝會唔會再發神經推高一把，索性企穩上面呢？Don't know！(知就唔駛返工啦！)
「明明今日騰訊(00700)做得咁肉酸，但係恒指都仲咁升得嘅？」雖然騰訊佔恒指成份比重好高，不過都唔係得騰訊一隻推得到個市嘅，就好似今日咁，內銀發力，非同小可。
內銀咩事彈？真係唔好問我，有時候股價上落都真係技術面做出嚟，事後啲人只係冠上一個因由，令到件事合理化咗佢就算，點解？因為10個有9個人都唔認為技術走勢可以成為一個「合理理由」囉。
是但啦，對圖表派嚟講，個圖走得合理就得架啦，就好似建行(00939)個圖咁，日線圖上建行踩住10天線已有逾一個星期，而SlowSTC(14,3)如今喺60幾呢個位作勢回升，換上保歷加通道則見整條保歷加通道有向上升嘅趨勢，且股價都Keep喺上升通道運行。
唯一要等嘅就係五分鐘圖建行個股價同SlowSTC(14,3)都已經爬到上天花板，要等佢冷靜一下先可以搵個位摺隻建行牛(53260)，收回價$6.1，同現價有近6.6%差距，逾14倍槓桿都預咗喺Day Trade用，等五分鐘圖SlowSTC(14,3)回落到超賣位時先小注進場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
