噚晚喺張床度碌咗好鬼耐先瞓到，搞到今日眼袋大過隻眼，怕且收咗市無咩事都係走先...
依家9點50分，恒指今早高開逾160點，上到29500點樓上，先將最貼價熊證29400至29499點全數殺清，呢度有相當於144張期指；雖然高開低走兼一度轉燈見紅，但由於恒指現價的確係近熊證街貨(牛證街貨最近為28800至28899點，今日新增嘅，得22張期指貨仔)；再加上日線圖其實都見恒指破咗由2月中至今嘅「下降通道」，50天線今日失而復得，SlowSTC(14,3)勢頭都由超賣水平追返上去，以呢個勢嚟講，隨時開隻長Call，Call返恒指上去，首個目標上20天線(29736點)又何樂而不為呢？只係求神拜佛10天線喺50天線擦身而過，咪生個「死亡交叉」嚟嚇我。
日線圖靚還靚，但都唔好盲衝入市。依家10點1分，恒指再次見紅轉紅，喺五分鐘圖上見保歷加通道口雖然未拓闊，但指數由今朝喺保歷加通道頂以外範圍下殺至保歷加下降通道，同步SlowSTC(14,3)都由今朝超買位落到依家超賣水平，開市即出熊的話，至今就完咗一個完美嘅Swing Trade；Well，又反過來說，當SlowSTC(14,3)確認到底然後見低位回升嘅話，或者係另一個出好倉嘅Swing Trade出現嘅時候，除非保歷加通道口忽然拓闊，比位恒指繼續向下走，咁SlowSTC(14,3)就會出超賣再超賣。
恒指牛(54235)，收回價28924點，同現價(10點14分報29354點)有逾400點差距，市場上最貼價牛證堆中最高槓桿一隻，咁就知道係Day trade用啦。
做Swing Trade就更係要有埋隻熊仔喺手啦，隨時SlowSTC(14,3)彈返上頂時見掉頭就反手，恒指熊(56036)，收回價29800點，同現價(如上)有逾400點差距。
比多一個tips：用保歷加通道+SlowSTC(14,3)做Swing Trade的話，小心保歷加通道中軸會擋你去路。
試下用呢個方法做Swing Trade，擔心嘅、唔熟手嘅、未試過嘅，就玩住paper trade先。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
