今日初七人日，好老土的同都同大家講句：生日快樂！雖然無收到公司HR email話返工，不過今日都係返一返嚟當開一開電腦幫自己開工；而坐附近、隔離team嘅同事都有返(即係之前嗰外籍同事個位，佢被外調至新加坡，換咗一班新同事坐喺度)，而我只係講嘅係：換走個女人，變咗一條全仔嘅team，都唔會靜得去邊！邊個話三個女人先一個墟架！
依家10點7分，恒指今朝早低開之後，跌幅一度收窄過，依家又再次拓闊返。開五分鐘圖就知恒指發生咩事，喺五分鐘圖上見恒指落到500分鐘線(5 X 100線)後再回升至50分鐘線(5 X 10線)遇阻；同步SlowSTC(14,3)都上到40未夠掉頭向下。換遠少少分鐘圖睇，就見到已經超買再超買咗幾日嘅30分鐘圖同小時圖上，SlowSTC(14,3)都已見明顯向下，整個走勢根本就係同你講緊：開淡倉啦！
冷靜啲，承如噚日[下半part]所指，目前恒指嘅走勢技術分析同牛熊證街貨圖係對立緊。以依家10點15分止恒指報20892點計，恒指現水平仍然靠近上方熊證街貨範圍，最貼價層為31100至31199點，本以為呢層都會全死，會直接以31200至31299點熊證首層，但截至依家為止恒指呈高開低走，開位相當於開市價，所以仲未死得住；至於牛證方面，終於都見到有「3」字頭嘅街貨層，最貼價為30000至30099點，呢度有相當於650張期指，全數新增兼且係重貨區，但那又如何？同現價都有逾800點差距，雖然目前諗唔到咩理由恒指會一步到位殺返落去牛證街貨，不過如大市出現大漲小回中嘅小回；再加上恒指牛再推更多更貼收回水平嘅新證，將牛熊差距收窄的話，到時又會變成另一個世界。
好似有啲遙遠，而且目前變數似乎有好多，如果稍後時間恒指五分鐘圖再見到恒指再上到50分鐘線無力再上的話，恒指熊(61322)，收回價31400點，同現價有逾500點差距，隨時用30分鐘圖day trade到落保歷加通道底。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
