噚日聰明絕頂嘅港府出咗新招嚟企圖「清零」：住宅大廈只要有一單源頭不明個案，或者污水樣本呈陽性，即納入強制檢測。強制檢測呢個部份的確有辣有唔辣，但係以污水樣本嚟決定的話就真係前無古人，今朝電視阿叔講得啱：個環境唔變嘅話，咁啲水點驗都係咁架啦！人，你識得叫佢哋帶口罩同勤洗手；咁地方呢？
依家9點34分，新聞都開始重複，市亦都開咗，一早高開升485點，報29378點，睇返噚日隻友邦(01299)今朝都同大市高開，不過好快又逆市下行，好彩噚日兩注都快速收手，今朝趁高沽都問題唔大，幾時都話喺輪證上有食唔食，罪大惡極架啦！
本以為恒指二話不說咁向上殺，將29300至29399點嘅熊證一開市就殺埋唔駛煩，不過恒指今朝似乎現放生喎；到依家10點正，恒指升幅雖然回升返，但最高都只係暫時見29378點，日線上圖見似乎今日打算挑戰條10天線(29327點)，同步SlowSTC(14,3)都見%K線回升返上%D線；到咗10點11分，恒指已經升抵29400點，升幅一度擴大至逾500點。
如果以日線圖計，恒指目前仍然未完全成勢企喺10天線之上，不過有份今日扶助恒指上行嘅港交所(00388)就係啦。
日線圖上見港交所於上周四(1月28日)失守10天線後，至今日隨市上行，SlowSTC(14,3)由始前嘅超買回落到中軸水平後回升；只係喺五分鐘圖上見港交所已經一支箭咁標咗上去，現時只能揀定隻港交牛(68337)，等五分鐘圖條SlowSTC(14,3)回落之後先迫上車啦。
(68337)收回價為$490，同現價有逾5%差距，都有成15.29倍槓桿架；若然day trade有位做到嘅，咁就梗係即日收錢啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
