今日天氣好似暖返啲啲，個人都feel到無咁乾，食咗兩日藥同搽咗兩日類固醇都好得七七八八；不過我依家先發現原來盒藥膏係寫住一日搽兩次，我應該一日搽咗四、五次...是但啦。
今朝叮燶咗我家老爺個麵包，搞到佢差啲要陪我食麥皮(嘻嘻)，食完嘢set好開工架步之後，望望個鐘都已經9點16分，恒指做緊U盤，見個股做得唔錯，彷彿一片欣欣向榮，不過，見到恒指五分鐘圖條SlowSTC(14,3)兩線上到90以上嚴重超買水平，所以都叫定聊天室戰友們開市捉定隻高槓桿嘅恒指熊，冧把都揀埋比佢哋啦，加油呀！
至於噚日喺[下半part]講過有一隻強勢股好鬼想捉佢掉頭，不過經過N日定月前試過捉中國平安(02318)掉頭，失敗都算，最慘嗰次High嘢High到傻咁滯，好彩嗰次走得快，所以今次我自己都有啲戒心。
到底呢隻正股係咩？噚日喺FB都已經有人估到，就係近期大熱嘅小米(01810)，「開佢淡倉？」係咪好大膽呢？
自從小米喺12月頭叫配股，集資額仲多過佢IPO時嘅$278.1億，股價即見裂口低開，好彩日線圖上見有條50天線支持。呢一次「股價大平賣」之後都吸引唔少想追入或加注小米嘅資金，至星期三(12月16日)股價最高見$29.95，迫近$30大關。
正當以為「$30不是夢」之際，呢兩日小米都見稍作回調，望望條SlowSTC(14,3)就知，因為已經上到90以上，近乎係無可以再上嘅水平，當然佢可以選擇超買再超買，所以噚日都有話要有比多少少時間，到今日SlowSTC(14,3)見進一步下行，至少%K線回落返至8字頭，股價亦回落至$28。
呢個高位回調樣其實唔算難搵，只不過對象係近期火紅嘅小米咁解。不如再觀察多陣先，隻小米Put(18808)，行使價$25.52，有約11.5%價外，低引伸、槓桿偏高，你見我揀Put唔揀熊都知咩事啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
