美股隔晚個別發展，道指破頂後倒跌，主要係美國多個州份喺疫情嚴重下，要加強社交限制措施，喺封城警告下，疫苗利好消息亦被抵銷，除咗納指保持升勢，道指跟標指均收市報跌。不過道指期貨喺亞洲時段回升，帶動恒指高開29點後，最多升46點，見26436點，其後掉頭向下，半日最多一度跌26127點，創11月13日以嚟低位。恒指中午報收26218點，跌170點；國指報收10380點，跌62點；科指跑輸跌92點，報8036點。
藍籌股個別發展，友邦(01299)升1.2%，大笨象(00005)跌1.2%，一升一跌互相抵銷恒指升跌幅。內銀股跟內險股普遍腳軟，港交所(00388)半日跌1.3%，相對呢期較為弱勢嘅JATM，港交所算算係阿Man嘅長線組合內，表現最硬淨嘅成員。而小米(01810)呢個X跑贏其他科網巨企，主要係其業務並非內地反壟斷法針對嘅電商平台，不過股價連升多日創新高後，今日半場亦要倒跌1%，當然長線阿Man仍睇好，但短炒喺配股宣布後撈貨後，僅兩星期急升兩成，有糊唔食，罪大惡極啦！話咗石油股唔使睇，油價略為反彈，油組就衝出嚟發放利淡油價消息，下調明年全球原油需求預測。阿Man都講咗好多次，經濟復甦需要時間，即使經濟重回正軌，但喺減碳排嘅大趨勢下，未來原油需求長遠只會有減無增，點計條數都係新能源有前景過傳統能源企業啦！
其實唔單止內地反壟斷，較早前美國亦向Facebook 出招，要求將其拆骨，將IG及whatsapp剥離。即係科網巨企正面臨全球性反壟斷法嘅影響。不過對於新經濟股前景，阿Man仍有信心，因為喺經濟結構轉變下，電商平台早已連接個人生活，JATM嘅平台提供嘅商機亦不能抹殺，未來中國經濟發展某程度上仍依賴平台經濟。反而喺反壟斷法政策落實後，相關企業會有更清晰指示，對未來發展前景更好。只係近日喺政策未明朗化嘅陰霾下，股份難免受壓，不妨待政策落實，屆時再作部署。至於已有平貨底喺手，長線投資唔怕大安旨意擺埋一邊，斷估點樣調整都好，100日線大部份都有強勁支持。
內需股講過呢轉較受資金歡迎，之前阿Man推介過嘅蒙牛(02319)今日逆市升2.7%。李寧(02331)獲大行上調目標價，股價再創新高，半日升逾5%，連升第四日。而吉利(00175)終於守得雲開，今日逆市上升，睇款呢轉有條件破頂，有貨不妨坐定定。
麥狄文
(徐狄怡‧證監會持牌人)
