繼續WFH日子，天文台一早講過呢幾日特別凍，今朝起身望出窗仲見天色幾好以為最凍嗰段時間喺清晨嗰啲，應該唔係好凍；但到依家9點33分，開晒機擺好個陣開工之後，一路打字啲手指一路變雪條。
開咗市大約半個鐘，恒指已經一度向下跌逾200點，最低見過26127點，將最貼價嘅恒指牛26300至26399點同26200至26299點全數殺盡，呢度有相當於679張期指；喺大約20分鐘前於聊天室講過「怕今日恒指會落去殺26100」、「唔落261，262堆牛都有啲擔心」，結果恒指就二話不說的向下斬，但講緊都只係得28點嘅距離，呢度嗰1070張期指都可以準備定RIP；天氣凍，咁重肥牛怕且遲早都被大戶攞嚟打邊爐。
猶記得放假前八掛過隻中國人壽(02628)，噚日見國壽喺$17呢個位的確似係有啲支持，更重要嘅係喺日線圖上見到SlowSTC(14,3)%K線低位升穿%D線，於是喺聊天室都有講底膽粗粗小注入國壽牛，結果今朝早見國壽跣腳穿$17，再加上恒指開始跳樓，於是就拿拿聲掉走隻國壽牛仔，呢一注只怪自已手多，亦好彩明知冷嘢所以都唔敢大注。
依家10點16分，今朝要搶恒熊嘅搶晒，反手出恒牛做DT嘅亦都做緊，呢期都真係以快打慢嘅策略為主。不過，睇返恒指日線圖，記得之前有畫過恒指依家行緊似疑「圓頂」走勢，至今呢個走勢都仲未有變，而日線SlowSTC(14,3)目前亦處於20附近，假設恒指再落的話，就會正式進入超賣區；問題係以截至10點19分止恒指最低見過26127點，已經一度失守保歷加通道底部(26186點)，而以 似疑「圓頂」的起步點，即11月初24460點計，目前恒指(10點21分報26246點)同似疑「圓頂」嘅起點仲爭成1786點，以目前日線SlowSTC(14,3)嘅高度，除非出下跌裂口加超賣再超賣啫，否則都難以追到呢個幅度；除非只係追到去11月9日個裂口頂25950點啦，呢個位同頭先mark底嘅現價有296點差距，呢個闊度就合理啲，只係大前題係條保歷加通道底會唔會喺度做架樑啫。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
