今朝起身天陰陰又濕笠笠咁，的確唔想離開個被竇，「你依家WFH，怕咩呀？」WFH唔駛做咩？仲忙過喺公司呀！做完U盤恒指開市升逾200點，報26634點，最令我痛心嘅就係今日首掛嘅泡泡瑪特(09992)，早在11月中佢嗌12月初IPO時已經睇好佢，仲特登喺Patreon首次寫IPO，今朝開市報77.1元，較38.5元招股價高一倍。「咁你心痛啲咩？都升一倍囉。」要中先得架，大佬！不過我明白向來我呢方面嘅運係爭咁啲，所以次次IPO都係用六合彩心態去入飛；「咁你唔孖？」孖你個死人頭咩，我都只係寫佢係黑馬咋，咁大隻京東健康(06618)同藍月亮(06993)夾住；好幸嘅喺噚日臨收市前喺入定恒指牛，好彩聊天室都有戰友跟住一齊入，條氣先順返啲。
見到隻中海油(00883)我諗大家條氣都同我一齊順晒，部署咗兩日嘅海油牛(58666)終於都守得雲開，日線圖今日終於見中海油出技術反彈，依家9點52分，中海油股最高見$7.07，5分鐘圖SlowSTC(14,3)都上到嚴重超賣水平，就當由今朝9點45分至依家SlowSTC(14,3)上到超買範圍計，(58666)期間高低位做過$0.11/$0.094，平均沽貨價為$0.102，對比兩日前喺[下半part]計嘅平均買入價約$0.073，呢一趟賺幅有39.7%，係未夠popmart一倍，但都係一個唔錯嘅early Christmas gift呀！
聊天室一早食晒餬真高興，個勢都真係唔好被佢停。噚日吼中嘅中國人壽(02628)，本來預佢會出七連跌，結果依家(10點7分止)出陽燭，而日線圖上SlowSTC(14,3)兩線仍然處於嚴重超賣水平，但數值上%K線目前仍低於%D線，都係一路做day trade，一路觀察住先，冷靜啲，分分鐘份聖誕禮物會唔會由AirPods Pro變Airpods Max呀！
BTW，聊天室被改名叫「輪證教室」，我家老爺改架；呢啲一地都係嘅名係好易撞，以我所知都已經撞咗其中一個發行商嘅專欄稿，是但啦，呢個又唔係專欄，費事用「明賺熱錢補習社」會無人認得；想再以知識別嘅，等我得閒有時間無嘢做醒起開電腦開埋photoshop嘗試畫個校徽；如果你有Idea，你畫都得架！等緊你！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
