美股隔晚個別發展，道指跟標指回調，納指則連升第三日再創收市新高，今日港股嘅重磅科技股都有不俗表現，可惜傳統股受壓，令港股噚日急挫後，今日進一步受壓，半日再跌逾百點，失守20日線(26500)，不過半日成交額751億元，扣埋新丁京東健康(06618)逾百億成交額，今日成交額唔算大，同時反映沽壓唔算嚴重。
恒指低開46點報26460點，已經係半日高位，開市無耐已跌穿20日線，隨後沽壓增加，最多曾跌190點，低見26316點半日低位，之後跌勢喘穩。最終恒指半日報收26344點，跌161點，國企指數跌43點，報10429；恒生科技指數升123點，收8068點。
大笨象(00005)半日跌近4%，藍籌股中包尾，友邦(01299)半日跌1.1%，兩隻指數重磅股都唔精神，咁個市自然唔慌好得去邊。內銀股跟內險股走弱，呢期侵侵不斷出招制裁內地企業，中海油(00883)母企遭正式納入黑名單，阿Man成日諗，美國再狠心啲，會唔會遲早搞埋啲內銀內險，當然呢啲只係阿Man自己諗，但侵侵一旦癲起上嚟，真係乜都做得出。雖然資金喺新舊經濟股之間穿梭交替，但一旦美國出手玩制裁，國企係先被針對對象。
科技股普遍做好，美團(03690)有傳新增「美團專業藥房」商標，半日升3.2%；騰訊(00700)半日升0.6%，小米(01810)集中火力發展手機業務，成效顯著，歐洲市場市佔率已躍升至第三位，股價半日升6.6%，阿Man上周呼籲 大家好趁小米配股抽水，股價震盪收集，24元樓下靚下上車，今日上到27元附近，重返配股價26元之上，輕輕鬆鬆一星期贏一成，對大家有晒交代。京東健康(06618)今日登陸魚缸，半日報108.1元，較招股價70.58元升53.2%。京東健康首掛可以大升，全靠市值跟估值要追上同業阿里健康(00241)，不過京東升到呢啲位，其實跟阿里健康已平起平坐，呢啲位再追貨，阿Man有保留。
汽車股今日又做返好，比亞迪(01211)連彈四日，股價半日升3.1%，重上180元水平，反而吉利(00175)呢期吽吽逗逗，喺21元樓下唔上唔落，睇款似收集中，估值方面遠低於比亞迪，落實跟戴姆勒合作發展新能源汽車引擎，前景做得睇好，阿Man認為呢啲位值得收集。內需股係最有條件避過美國制裁嘅內地企業，除咗零售銷售業務唔算政治敏行業，內需亦係政策支持嘅行業，之前阿Man 提到40元邊買蒙牛(02319)，今日不妨睇睇海底撈(06862)。
麥狄文
(徐狄怡‧證監會持牌人)
