話說我有位飯腳斌少，之前喺呢度都有提及過佢嘅威力都唔止係燈咁簡單，諗住買Tesla但無美股account但都照問我意見，結果當晚Tesla急插兩成；lunch口痕同我哋講想買滙控(00005)，結果大笨象落到$27。
無啦啦提起佢更係有事啦，話說噚晚最爆嘅係全地球期待嘅螞蟻上市，臨埋門前一腳A+H宣布暫緩，當然主要嘅原因係有人串咀，不過喺我哋嘅眼中，都應該係斌少All in IPO累事；好彩之前有唔少朋友都問話好唔好借孖展抽我都say No，只係唔知呢鋪銀行肯唔肯退手續費啫。
噚晚等美股開市都係想睇阿里(09988)喺外圍嘅表演，一開市無耐阿里跌8%、9%，到港股開U盤後，阿里如同達叔嘅「星仔接力」，到正式開市無咗8%，而恒指都只係跌點零點，但一眾聊天室們手上嘅過夜恒指Put、熊同埋阿里Put、熊齊齊開櫃筒收錢；更激嘅係以為大市會繼續向下行，誰不知低開高走，好彩叫得切大家即時反手，有驚無險，提早收工。
依家10點24分，恒指由今朝低位24733點反彈至25093點後再向下走；不過，見到恒指牛熊證街貨圖嘅話，你就會大方向仍然睇上，阿里、港交所(00388)同騰訊(00700)由得佢哋啦。
應該係噚日恒指搶到上25000點樓上關係，今日見熊證最貼價25000至25099點終於得返221張期指；不過25100至25199點、25200至25299點同埋25300至25399點都有過千張期指坐鎮，再跳一層去到25500至25599點都有過千張街貨喺度。
至於牛證方面，今日見都不是省油燈，新增六層街貨上嚟，最貼價上到24600至24699點，咁當然街貨唔會多架啦。再睇返日線圖見恒指由今朝嘅陽燭，變成依家陰燭，都係多得美期插300幾點所致，個市咁Chok，地球另一端又開始點 票，都係睇吓電視算啦，或者同班同事賭下邊個贏，贏幾多票算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
