新一輪刺激經濟方案喺下月初美國總統大選前已無望實現,即使連規模較小嘅援助方案,參議員一姐亦唔首肯,美股隔晚先升後回亦好正常,仲要喺大選前未知侵侵會否對中國重鎚出擊,而美股又踏入業績期,美國嘅缸邊友先觀望亦無可厚非。
恒指低開133點,重返50日(24597)及100日(24660)之下,之後跌幅擴大至超過280點,其後跌幅收窄,一度見半日高位24573點,跌幅收窄至93點後又反覆回落,中午休市前一度跌354點,見24312點半日低位。恒指中午報收24350點,跌316點;國指半日報收9846點,跌74點;恒科指跌200點,報收7619點。
藍籌股個別發展,有消息傳出螞蟻集團或遭美國納入貿易黑名單,其上市計劃或受阻,啱啱尋日先有消息指中證監或延遲螞蟻集團A股上市審批,但阿Man反而唔太擔心中證監有心阻撓螞蟻上市,但美國呢一下真係嚇親缸邊友,半日螞蟻跌幅達3.5%,港交所(00388)亦跌1.7%。騰訊(00700)半日跌2.9%;美團(03690)跌小米(01810)分別跌3.5%及1%,ATMX今日唔精神。
而重磅友邦(01299)則跌2.5%,大笨象(00005)毫無起色,半日再跌0.65%,反而喺人民幣持續走強下,工行(01398)跟建行(00939)則逆市升1.2%及0.37%;平保(02318)半日亦升0.6%。濠賭股阿Man之前都講過濠賭股難有運行,整個板塊今早繼續受壓,國內擬修《刑法》,把境外賭場人員組織、招攬中國公民出境博彩嘅活動正式入刑,加大懲罰力度。一眾濠賭股少咗內地一至大豪客,貴賓廳業務呢次無眼睇,大部份濠賭股閒閒地跌2%或以上,銀娛(00027)半日跌1.5%已算跌得少。
汽車股近日表現較佳,今早汽車月股跑贏大市,藍籌股中吉利(00175)表現最佳,半日升1.7%,而阿Man最睇好嘅新能源汽車龍頭比亞迪(01211),半日升2.2%,盤中創143.5元上市新高。除咗汽車股做好,4S股永達汽車(03669)及美東汽車(01268)分別升7.3%及4.6%,表現出色。
至於半日勁升逾三成嘅五菱汽車(00305)及五龍動力(00378)則不敢恭維,呢啲市值咁細股嘅股仔,好易被人為操控,實在無必要入去同莊家博奕。個別生化藥股繼續受捧,當中阿Man愛股之一嘅信達生物(01801)半日創上市新高69.75元,中午升3.6%,公司有人士調動,而市場對相關調動似乎感到滿意。
麥狄文
(徐狄怡‧證監會持牌人)