喺聊天室傳來一個好消息(唔係食胡，食胡呢個動作就嚟變成default)，而係室友awkf嘅公主出世啦！辛苦awkf太太之餘，希望你哋一家人以後都開開心心，健健康康過每一日，恭喜晒！
依家9點46分，今朝搭早咗一班巴士返嚟，諗住星期一早少少返嚟做嘢(逢星期一係特別多嘢整)，喺巴士上見恒指開市升98點後，落車行到返嚟就見升幅擴大，至依家已經升327點，做緊24446點；再過多10零分鐘，恒指進一步攀升至24500點以上，即係話熊證首兩層街貨已全數死亡，呢兩層夾埋有相當於795張期指，而熊證最貼價層亦上移至24500至24599點，呢度都有成752張期指。
至於牛證街貨方面，最貼價層為23900至23999點，呢度有相當於111張期指，亦係新增街貨層。本身牛證新增多一層之後，係令到牛熊證街貨之間差距收窄，不過恒指開市後升逾300點，再度令兩者距離拉闊。
以目前恒指現價同街貨嘅距離比較，當然係上行殺熊啦，不過以5分鐘圖見(都唔止，基本上所有分鐘圖都係咁)，SlwoSTC(14,3)已經上到嚴重超買嘅水平，假設恒指再向上殺上去，超買再超買又有咩問題？
說話又唔好咁講，皆因問題只係在於打算今日出手偷位食熊；講真，就算室友想偷位出恒指熊，我都唔敢同佢哋博，事關市實在太強啦；要偷位食熊索性吼吓個股好過，就好似騰訊(00700)咁，今日騰訊當然跟市上行，截至10點15分止最高見過$553.5，同始前「三頂」位$564仲有$10.5，話多唔多，話少又唔係少；配埋條保歷加通道嘅話，今日粒燭仲剛好穿咗個頂添，再加埋條處於超買至嚴重超買中嘅SlowSTC(14,3)，騰訊熊(57243)，收回價$580，高於「三頂」位，逾17倍槓桿Day trade嚟講都算不俗，一如以往吼5分鐘圖上SlowSTC(14,3)上到超買位落場(今朝室友出咗手啦...應該)。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
