噚日見恒指高開低走，就揀定隻恒指熊(50799)出嚟接佢下行，按5分鐘圖SlowSTC(14,3)見，喺噚日朝早11點50分至11點55分，同埋下晝嘅1點20分至1點30分，SlowSTC(14,3)上到80以上嘅超買水平，按呢兩個時間(50799)高低位做過$0.077/$0.073，同埋$0.076/$0.073，平均買入價分別為$0.074同$0.0745。
不過，噚日恒指開高低走至240XX點呢啲覓得支持，幾近橫行到下午2點35分，忽然向上一跳至241XX點，臨近收市更進一步挾高，至收市前最後五分鐘高見24199點，而(50799)黯然過夜。
到今日其實大家都預咗恒指會再高開一下，事關今日係A股國慶長期假後復工首日，按照「傳統」A股點都會開紅盤賀一賀佢，不過之後點走，大家都心中有數，攞彩嘅嘢，你明嘅。
依家10點30分，恒指今朝早開升150點後向下走，由於時間關係，喺開市後約15分鐘已火速補回今朝開高嘅裂口，5分鐘圖上SlowSTC(14,3)喺10點到落到嚴重超賣，過夜熊(50799)本想收工，但望望證價當時高低位做過$0.072/$0.065，均價$0.0685，對比噚日平均買入價輸六格，輸少當贏。
今朝最威嘅都莫過於阿里巴巴(09988)，今朝早高位見過$292.4，不過之後就向下走；猶記得星期一(10月5日)想捉佢高位回落出熊，但後來因為5分鐘圖見佢點數完全唔郁，得條SlowSTC(14,3)揈嚟揈去，於是放棄咗；好彩放棄啫...
依家11點11分，時近年底的確係有啲忙，見到恒指依家報24203點，升10點，似乎高開過後跌定咗，靠近242XX點呢啲位游走，咁都啱嘅，近熊證街貨點都有飯開先啦；室友們一早喺5分鐘圖上約10點5分出「早晨之星」出現時就開恒指牛，到依家點數上返少少，而SlowSTC(14,3)都慢行到60幾靠近超買呢個位，怕且如果再等下轉恒指牛嘅話，可能係下半場嘅事啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
