雖然我平時成日都話：「好又一餐，唔好又一餐」，但基於我身邊有兩個貪吃鬼，一個係我戰友Jack，另一個就係我家老爺，於是每次有趁好嘢食嘅話，戰友Jack同我開心share完之後，我再第一時間同我家老爺分享，以便團購落單，今次呢堆台式食品都有，我都未食過架，試下囉！
噚日嗰注地鐵(00066)Call，今日喺聊天室繼續講緊(放心，點都會喺你哋優先嘅)，只係佢日線圖實在太愛不惜手，怕佢輪場太冷嘅話，正股都要吼下佢，反正低位見「身懷六甲」，今日再見陽燭，轉勢幾可確認。
至於噚日見到嘅阿里巴巴(09988)，日線圖都係樣樣衰衰，但噚日朝早吼一轉熊失敗之後，雖然揀咗隻阿里熊(53728)出嚟，但喺5分鐘圖上見到即使SlowSTC(14,3)有上落過，但阿里嘅股價就仍然橫行狀況，咁唔開胃嘅走勢都廢事掂佢，多一事不如少一事。
今朝天氣明顯清涼，望望月曆原來聽日係廿四節氣嘅寒露，即代表深秋到來喎(Google講嘅)，都係嘅，只係得恒指仲係熱烘烘咁，又再闖24000點關。
依家10點24分，恒指今朝開市升19點，報23999點之後，到正式開市後一度向下走，至依家再次集氣回升，熊證第一層街貨24000至24099點全數陣亡，呢度有相當於161張期指，最貼價層上移至24100至24199點，呢度都有481張期指架；而重貨區就係第三層嘅24300至24399點，有1517張期指。
至於牛證方面，今日無新增街貨層，最貼價層為23400至23499點，呢度有相當於721張期指，有量又如何，唔近先麻煩嘛。
但最麻煩嘅係連一個入牛嘅機會都無；本身有諗過好唔好拆到用最細嘅分鐘圖硬闖入牛，恒指牛(50223)，收回價23549點，同現價有逾500點差距，市場上最貼價牛證中槓桿最高之一，有逾41倍，成交活躍，都係比啲耐性等下先啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
