一連放咗四日假期，我連埋上個星期一至三(9月28日至30日)放咗成九日；返到公司一開電腦，再加埋今日星期一，睇嚟都係要快手快腳先得。
放假期間美國總統特朗普確診新冠肺炎，道期一度急挫，或者之後佢被送往軍醫，以及國慶後第一個交易日，恒指今朝高開大裂口升580點，開市報24039點，一舉殲滅首三層熊證街貨，夾埋食咗2024張期指，令熊證首層街貨上移至24000至24099點。
至於牛證方面，今日見有新增街貨層，為23300至23399點，呢度只有55張期指。而牛熊街貨中間位就係(24000+23399)/2=26399.5點，按依家10點36分，恒指高開後下行至目前23795點，升336點。
開咗市一個鐘其實都真係無咩嘢可以做得到，事關恒指一開始彈上去之後回落至升300幾點，呢個情況持續咗成朝，到依家都仲係咁，以目前恒指現價計點都係靠近熊證街貨區，除非一陣新聞傳出話特朗普病情惡化，要靠呼吸機啦，否則都唔似會無啦啦又反手下插(現價起跳計)400點向牛證方向出發(仲要倒跌添喎)，怕且今日都係向個股埋手比較好。
喺聊天室較早前見到滙控(00005)由10分鐘圖開始至小時圖見到喺10點至10點10分呢段時間，$31.9成為咗圖上嘅「平頂」位置，建議用隻高槓桿滙豐熊快手一轉；搵搵下搵到阿里(09988)，今次唔係用5分鐘，轉新嘢用小時圖，見阿里喺今朝開市裂口高開後出現咗粒「吊頸」，其後第二粒暫見為「T星」，兩粒夾埋變「身懷六甲」，而SlowSTC照用返(14,3)，不過已經由上個星期到依家都處於超買至嚴重超買範圍，阿里熊(64861)，收回價$310，同現價有逾10%差距，因為預期未必係Day trade完成到嘅trade，所以揀遠少少，槓桿比率約8.78倍，再穩陣嘅等SlowSTC確認%K線高位穿%D線先落場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
