噚晚美股繼續下跌，今朝日經都見到有200至300幾點嘅跌幅，恒指亦都唔執輸，今朝開市跌329點，報24295點，呢口開市價已經將牛證第一層街貨24300至24399點全數殺死，係呀，呢層就係朝思暮想、日盼夜盼想佢死全家嘅近牛重貨層，不過今日見呢度只得841張期指。
唔緊要，向來一日三餐早餐都唔係食得最多，放遠少少見24100至24199點同24000至24099點分別有1532同1838張期指，不過恒指日線圖見今日成支燭跌咗出保歷加通道底部(24463點)以外，而SlowSTC(14,3)都已經落到去超賣水平，且%K線有到底橫行，準備抽升%D線嘅跡象，價殘樣齊晒，問題只係保歷加通道口拓闊，會係恒指自己彈返入去，還是以拓闊盡力包住條指數。
依家10點19分，恒指現價同今朝開市時差唔多，悶咗接近一個鐘之後，都係索性睇返隻平保(02318)算。
今日平保就梗係同市一齊下行啦，日線圖見今日燭身處於100天線($81.217)以下水平，上方10天線($81.635)愈迫愈近，「死亡交叉」隨時出現，之但係SlowSTC(14,3)仍然發出利好訊號。再望望平安牛(63944)，依家證價做緊$0.114，同噚日計落嘅平均買入價$0.115都唔係爭好遠，試下守到下晝睇下發生咩事先。
呢兩日ATMX四大科技股都跌到媽媽聲，但聲音好兩極，一邊就話要趁低買，一邊就話要借機Put，我向來都比較少湊熱閙，轉角見到隻港交所(00388)，計埋今日都算叫做六連跌，今日仲跌穿埋50天線($369.37)，且股價落到保歷加通道底部($361.67)，SlowSTC(14,3)兩線準備一齊進入超賣區，mark定你應該無死錯人。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
