經過幾日來恒指去到相對多街貨範圍都出現「輕食」情況，今日恒指終於都開餐，今朝開市跌94點，報25026點，但見恒指5分鐘噚日收市留底落嚟嘅SlowSTC(14,3)%K線勢頭向下穿%D線，相信恒指今朝開市下行殺牛證機會較高(係聊天室都提及過)；果然在開市無幾耐恒指就好似跳樓咁向下跌咗落去，最低見過24837點，將牛證第一層街貨24900至24999點全數殺清，呢度有相當於333張期指。
下殺過後恒指再度彈升，喺5分鐘圖上仲見到支「大陽燭」爆咗出嚟，之後恒指就拾級而上，由跌轉升，至依家10點12分，恒指倒升68點，做緊25188點，最高暫見25223點，以高位計恒指的確係踩咗上熊證第一層街貨25200至25299點，而呢度就有相當於104張期指，量唔算多，但如果個市玩嘢好似噚日(定前日)牛熊通殺嘅話，咁只能夠做嘅就係用高槓桿牛熊喺5分鐘圖上，用SlowSTC(14,3)做Swing Trade。
還記得早兩日收埋咗隻平保(02318)喺watch list度嗎？今日再睇平保日線圖股價已回落至100天線($81.054)附近，換保歷加通道出嚟嘅話，就更加見到平保已經係連續第三日挨近保歷加通道底附近游走，但略嫌日線圖上SlowSTC(14,3)即使兩線落到嚴重超賣水平，不過%K線低位未升穿%D線作確認之前，一日都唔會出手。
今日係我大學老友Marilyn生日，你就好啦，依家先3X，我同你同年但一早已經到咗3X啦，哈哈，生日快樂！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
