終於都捨得喺屋企解拆咗部陪伴我成長嘅PS3(90後可能將PS3視為我年代嘅紅白機/PC engine)，但講緊嚟緊聖誕啲人都會換PS5，於是今日就將部機拎返嚟公司，一來屋企無位，二來睇下lunch time班仔食完外賣會唔會玩兩手，無咁悶啦(我帶埋兩個手掣同10隻games返嚟架)。
拎到手都震終於都返到公司，今朝喺聊天室時一早講定恒指今日下行機會好高，分別在於只係彈一彈還是係一插無水花，點解？因為街貨圖囉。
今日恒指牛熊街貨圖上有好多新增熊證街貨層，將牛熊兩邊嘅差距收窄至25200至25099點同24900至24999點之間，以噚日收市價計恒指的確係近熊證街貨，不過新增街貨層往往都唔會儲得好多貨喺度，只係怕恒指開波後上行先食近熊證街貨就反手向下殺牛。
結果今朝恒指做完U盤後報25239點，升55點；到正式開市時恒指呢口開市價似乎已經成今日高位，高開低走成定局，二話不說地向下直插至24931點先停。
依家10點15分，恒指5分鐘圖上SlowSTC(14,3)已經回落至嚴重超買水平，Day trader就更係快入恒指牛博走一趟；但如果追唔切呢一趟，或者同我諗法一樣，都係睇住街貨做trade嘅話，咁就要比啲耐性，等恒指5分鐘圖SlowSTC(14,3)上到去超買水平時，小注恒指熊(50724)，收回價25688點，同現價有逾700點距離，25倍槓桿啱day trade用；分分鐘今日下行勢強，5分鐘圖SlowSTC(14,3)上到去中軸已經唔得啦。
至於噚日喺[下半part]講嘅平保(02318)，繼續喺watch list度先。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
