今日9月1日，係學生開學嘅大日子，過去都會見到有條茂四出嚟叫大家當日返工返學要提早少少出門，因為繁忙時間人較多；但今年大家都應該喺屋企用視像開學，點樣喺個電腦度同全校師生一齊搞開學禮呢？在線等。
噚日恒指死吓死吓，拎埋禮物上到25800點敲晒門都無人應，可能佢以為我哋成班好似人哋新年推車仔送盤桔收「老毛」，所以唔開門(依家應該無呢啲事發生啦掛，我都係聽老爸講架咋)。
隨後恒指掉頭回落，並以全日低位25177點收市，見恒指5分鐘圖SlowSTC(14,3)落到嚴重超賣，估今朝早應該出現技術反彈，好讓噚日話牛仔過夜嗰班有個逃生門。今朝喺巴士上見恒指開市報25085點，到9點半開工恒指二話不說向下插，截至依家10點14分止恒指最低做過24995點，牛證首兩層街貨25100至25199點同埋25000至25099點全數死亡，呢兩層夾埋有相當於878張期指，9月第一個早晨全餐幾肥美。
大戶食完早晨全餐之後，恒指先至出現技術反彈，依家10點17分，收到舊同事天爺比我家老爺嘅豬腳薑醋禮券(多謝天爺！恭喜天爺又添丁！)後，恒指依家做緊25197點，升20點，而5分鐘圖上SlowSTC(14,3)由開市時嘅嚴重超賣位回升至7X水平，不過%K線目前仍然高走於%D線，安全起見都係等到%K線高位跌穿%D線確認後，恒指熊(55441)，收回價26000點，同一收回價中槓桿第二高，低街貨，唔望佢今日再食牛證街貨，都望佢今日再次調頭。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
