話說噚日睇中咗近熊重街貨，於是揀咗隻恒指牛(64352)出嚟，揸到下晝都見恒指無厘起色，又見佢收回價24918點，同噚日個收市價又有成500幾、600點距離，唯有過夜一博；誰不知噚日收市後競價時段唔知邊個將恒指搶高至全日高位收市，至今朝早開市恒指雖然跌35點，報25,586點，到依家9點36分，恒指跌轉升58點，做緊25610點，(64352)證價做緊$0.062，對比噚日平均買入價為$0.055，七格落袋嘅貨仔唔算多，但見恒指5分鐘圖SlowSTC(14,3)上到嚴重超買水平，都係先行收隊為上。
至於噚日喺【下半part】講過嘅騰訊(00700)，今朝未正式開市時見5分鐘圖SlowSTC(14,3)上到嚴重超買水平，其中%K線更高見100，噚日揀定出嚟嘅騰訊Call(12492)，即使想做嘅策略耐少少唔係day trade，但都係比多少少耐性，等佢回一回好啲。
依家9點42分，恒指點數上仍然未有大太變化，爬咗上25600點樓上，叫做將噚日殺剩嘅25500至25599點嘅熊仔都全數清埋，變相以25600至25699點呢度作為恒指最貼價熊，呢度有相當於654張期指。至於大家著眼點都放喺25800至25899點呢度，事關有成1122張期指進駐；再高少少，上到26000至26099點呢度都有相當於1160張期指。今個星期五(28日)就係期指結算日，你會一口氣吞埋佢落肚？還是今個月已經儲夠貨，留嚟下個月開餐？
至於牛證方面，今日見都有唔少新增街貨層，最貼價推高至25300至25399點，話明新增街貨層，當然唔會有好多街貨喺度，換言之，即使明知牛熊兩邊最貼價層差距只有約200點咁窄，但以街貨分布嚟講，始終都係上行較吸引。
恒指牛(63540)，收回價24850點，距離現價有逾700點，槓桿比率43.31倍，等恒指5分鐘圖SlowSTC(14,3)落返嚟先講。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
