今日返嚟公司，主要都係簽啲part time單出糧；無得home office嘅Pantry CEO珠姐又整咗個蛋糕返嚟，凳都未坐暖就問我食咗早餐未，話砌啲比我食，仲問我食唔食燒賣，因為佢同樓上層嘅Pantry CEO Ming姐大手買入，依家兩位CEO喺Pantry蒸燒賣中，真開心。
依家9點51分，恒指今朝早彈升230幾點之後，到依家升幅已經進一步擴大至升逾350點，報25466點，高位暫時做過25496點。
再開恒指牛熊證街貨圖，見首三層熊證已全數死亡，最貼價嘅25400至25499點其實都同死晒無咩分別，就當佢死埋，呢四層有相當於1146張期指，望望月曆，今個星期為8月最後一個星期，而星期五(28日)為期指結算日，按照傳統智慧期指結算時大市都會做得比較好，咁當然10次總有幾次例外啦，只不過按目前恒指現水平同熊證街貨咁近，怕且今次都可能按傳統智慧發展。
至於牛證街貨方最貼價為24600至24699點，呢度有相當於264張期指，但同現價比已經有逾1000點嘅距離，雖然今日見有新增牛證上市，最貼價為25300點，同現價(9點59分)報25507點有207點差距；不過，都係嗰句，恒指現水平已經上到去熊證街貨，25500點都上埋，即第四層熊證街貨正式全數被收回。
拆恒指5分鐘圖見今朝恒指彈升，SlowSTC(14,3)已經被搶至嚴重超買水平，依家%K線同%D線都處於90以上位置，按慣常策略計其實係要等到SlowSTC(14,3)回落到超賣水平先至好入場；但今日個勢再加埋街貨分布嚟講，怕且SlowSTC(14,3)回得落去中軸位都已經謝天謝地囉！
恒指牛(64352)，收回價24918點，同現價有逾560點差距，換股比率10000，槓桿比率46.34倍，貼價只為Day trade，唔求即日再殺26000至26099點重貨，但25600至25699點最多新增層嗰575張期指，唔係咁快就收手呀？依家先10點6分咋喎，諗諗佢啦(又幫幫忙啦！)
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
