一瞓醒就已經9點幾，一開電視就見到掛咗一號風球，刷完牙之後再睇電視就見到林鄭出嚟講第三輪抗疫基金，然後恒指高開完之後又再次下行，明明開報254XX點，但死也不上25500點，殺第一層熊證街貨。
先望望牛熊證街貨圖，今日見牛證有兩層新增街貨，最貼價上到去25100至25199點，呢度有相當於110張期指；至於牛證重貨區就喺老遠嘅23700至23799點，不過都係講緊得775張期指。
熊證街貨依然吸睛，雖然最貼價層25500至25599點有19張期指，但上多層，即25600至25699點就有相當於412張期指；而重貨區就喺25800至25899點，已經儲咗成1048張期指。
坦白講日線圖上恒指走勢的確唔算好差，目前處於「上升通道」底部，頂部同250天線(25802點)好近，只不過係咁啱喺呢個位置遇上保歷加通道頂(25517點)，而同步見保歷加通道頂略有收窄，SlowSTC(14,3)亦處於8X嘅超買範圍，確係有啲難搞。
恒指唔多郁，第一時間就更係望下隻騰訊(00700)倒底發生咩事。
一開騰訊日線圖，哦，唔怪之得啦，股價自8月7日低位踩過落去50天線($508.8)之後就一直挨住條50天線運行，有兩次更無啦啦差錯腳跌穿過，日線圖上SlowSTC(14,3)已經落到去1X超賣水平，今日暫見「十字星」，要反彈返上去嘅話，第一步要過10天線($521.5)呢一關...
好，約定等你！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
