話說今日返工，一如以往坐巴士返公司，人唔多太家都隔一個位先坐，保持距離，而架車就有好強烈嘅消毒藥水味道，係好事嚟嘅，聞一聞醒腦提神，但下一刻濃到有少少反胃。
一返到公司就見到Pantry CEO珠姐爆seed，實質內容唔知，只係隱約聽到同拉窗簾有關；我無理佢，因為佢有佢老友、樓上嗰層嘅Pantry CEO阿姨安慰中。
依家9點42分，恒指開咗市一陣，開嗰陣報24376點，跌15X點；至依家跌幅略為收窄至跌109點，做緊24421點；最低暫見24301點，同100天線(24263點)或保歷加通道底部(24258點)相約；之前都見識過100天線嘅支持力度，雖然上個星期五(8月7日)係穿過一次，但今次加埋條保歷加通道底部嘅話，小心兩條線「輸人不輸陣」。
再睇埋恒指牛熊證街貨圖，今日見熊證有三層新增街貨，最貼價落到去24900至24999點，呢度有相當於273張期指；至於牛證最貼價層就落到去24100至24199點，呢度有相當於806張期指。計計牛熊街貨中間價24549.5點，按依家9點48分恒指做緊24370點計，的確係近牛證街貨層。
拆個5分鐘圖出嚟睇，今朝低開之後恒指一度將跌幅收窄至跌100點都唔夠，當時SlowSTC(14,3)亦都只係到中軸水平，跟手又再向下行，至依家9點51分由到落到3X呢啲位。假使望住街貨嚟做trade嘅話，24000至24099點呢堆重貨熊(有相當於1067張期指)真係好吸引，再者日線圖都見SlowSTC(14,3)明顯掉頭下行啦。恒指熊(62899)，收回價25063點，同現價有逾700點差距；安全啲嘅可考慮恒指熊(69069)，收回價25438點，同現價有過千點差距，逾21倍槓桿同收回價中最高。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
