依家9點44分，今日返嚟公司本身都係收件嘅，誰不知件貨上個星期五已嚟到公司，好彩咁啱有識得嘅同事喺度幫我收咗，仲鎖埋入櫃，真係人間有愛。
落巴士時恒指剛剛做完U盤，嗰時都係鐵幾十點，開市報24566點，再快手開埋牛熊證街貨圖睇，見到開市價已經踩住第一層熊證街貨24500至24599點，呢度有相當於511張期指，都估到呢層死梗。果然一開市即向下插24441點，就連第二層嘅24400至24499點都差啲無晒，不過又真係同無晒無乜分別。
反正開咗牛熊證街貨圖，就睇埋落去先啦。依家最貼價嘅24400至24499點，呢度有相當於626張期指，但按截至10點6分止恒指最低位都仲係24441點計，再將每層街貨拆細至以50點為一層，即24450至24499點嗰234張期指都已數死亡。
揸住鎖匙嘅同事返到公司，背囊都未放低就行咗埋嚟我呢度，然後再幫我開佢哋個櫃拎返我件貨出嚟，整好晒之後再望望個市，已經連24400至24449點嘅熊證街貨都殺晒，呢度有相當於393張期指。
依家10點26分，恒指跌勢未止，最低暫時見過24309點，換之言連24300至2 4399點呢度都凶多吉少，而呢度有相當於491張期指。就當呢層全數死亡，今朝開市1個鐘內恒指已經殺咗1628張期指，同時可以直接將24200至24299點嘅牛證作為第一層街貨，呢度有相當於726張期指。而重點係，喺24100至24199點呢度就已經係牛證重貨區，有相當於1015張期指。
鏡頭一轉，再望望電視機，已經見到恒指再創日內新低，跌幅亦擴大至逾300點，恒指熊(56389)，收回價24773點，同現價有逾500點差距，市場上槓桿最高熊證，即日見5分鐘圖上SlowSTC(14,3)回彈後入市，Day trade博下殺牛證重貨區吧！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
