6月12日果然係個動盪不安嘅日子。上年今日恒指就跌481點收市,而今年就更加大裂口低開逾500點開市。
噚日一支大陰燭向下插,隔晚美國嗰邊就怕新冠肺炎會爆第二波,道指一度跌逾1900點,收市都跌逾1800點,屬歷來第四大跌幅。今朝起身日經都跌400至500點,港股都應該唔好得去邊。
今朝恒指開市低開559點,跌穿24000點,報23920點,唔 單止係10天線(24462點),就連20天線(24014點)同50天線(24011點)都無埋。依家9點54分,恒指跌幅收窄,至跌359點,做緊24120點,叫做爬得返上去20同50天線之上。
開恒指牛熊證街貨圖睇,見牛證首五層街貨都已經全數死亡,最貼價嘅牛證街貨落返去23800至23899點,呢度有相當於55張期指,再落多層會好啲嘅,即23700至23799點,就有相當於412張期指;而重貨區就係喺23300至23399點,呢度有相當於1018張期指。
至於熊證方面,今日見到有三層新增街貨,最貼價嘅又落返去25000至25099點呢個位置,貨量唔多,有相當於50張期指;重貨區就積咗喺25300至25399點,呢度有相當於911張期指,而上多兩層熊證街貨,每層都有過800張期指架,如果呢班淡友唔貪心嘅,相信今日都應該收割都應該幾禾味。
開恒指5分鐘圖睇,依家10點3分,今朝低開嗰下喺5分鐘圖上SlowSTC(14,3)就更係落到嚴重超賣位啦,跟手恒指跌幅收窄,到依家跌幅再收窄啲,講緊少於300點,而5分鐘圖上SlowSTC(14,3)都只係爬到上3X呢個位。假設今日恒指喺餘下時間繼續做鐘擺嘅話,唔敢講話可以將5XX點呢個裂口收補晒,但跌幅應該可以再少,企得返喺20天線之上,都叫做仲處於保歷加上升通道裡面先啦。
又咁講,恒指現價擺返去近牛證街貨方向,日線圖SlowSTC(14,3)已確認高位下行,萬一今日資金見恒指低開後跌幅火速收窄,低開高走博下個星期又無事發生嘅話而入牛證過夜,言則牛證就會又儲落一堆街貨,到時就...
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家