6月第一日開局果然係新一番新景象,恒指今朝開市升578點,報23539點;到我落咗車之後,再嚟多個message話恒指已經升逾800點。到依家9點56分,坐底開晒所有嘢之後,就見到恒指日線圖現水平已經至保歷加通道中軸(23810點),而10天線(23540點)就今朝開市時已經升穿。其實睇返個日線圖就會見到依家恒指其實係被條10天線同20天線(即保歷加通道中軸)夾住,而SlowSTC(14,3)%K線升穿%D線,唯兩線水平處於3X,都尚算係一個低位。
再開埋恒指牛熊證街貨圖睇下先,今朝恒指彈升,已將熊證首七層街貨全數殺清,就連重貨區23700至23799點已殺埋,呢度有相當於1523張期指,變相依家23800至23899點先至係最貼價熊證街貨層,而呢度有相當於1136張期指,按截至10點6分恒指最高做過23806點計,呢一層街貨暫且都可以叫做無事嘅,不過裡面有幾多喺23800點一到步之後就四散呢?就真係不得而知。
更重要嘅係,喺第二貼價熊證街貨層,即23900至23999點,都有過千張期指街貨係度。而其實今日恒指一度爆升逾800點計,唔排除有資金會出手博大市掉頭,可能新一個重貨區就喺24000至24099點,甚至24100至24199點,始終過一個字頭就難度加10,而就算未上得到24000點樓上,升穿20天線,由保歷加下降通道爬返上保歷加上升通道,都總算係一個好兆頭。
至於牛證方面,最貼價層為22700至22799點,呢度唔多街貨,只有相當於31張期指街貨,可能係因為新增街貨層啦;但點都好,就算呢層再多對於現價嚟講都係距離太遠,實在難搞。
追升或者係依家最正路嘅方法,但開5分鐘圖見到恒指SlowSTC(14,3)由開市至依家(約10點11分)都係處於超買位置,想落隻恒指牛(50987),收回價22952點,同現價有近700點差距,市場上最貼價牛證中,槓桿最高都要等一等,或者今日升咁得chur,追即日升做day trade嘅話,都要等到SlowSTC(14,3)回落至相對低少少嘅位置先至比較理想。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家