神奇呢!喺第20日home office嘅時侯,明明噚日收市後戰友Jack同我講道期跌過700點;噚晚仲為咗道指跌過千點而出咗三個push notification;今朝未開市時,見到日經跌600至700點,仲諗緊噚日我老細同我講26500點一步到位之際,恒指開市報26722點,跌98點;我仲以為自已隻App啲data有錯,直到我開港交所(00388)個website去睇...好啦,我信啦。
咩事咁跌法?坊間講緊個原因係市場擔心新冠肺炎對全球嘅經濟有影響;我知唔係今日先有新冠肺炎出現,亦都唔係第一日大家出嚟講呢個話題,都係嗰句:個市要跌,所謂嘅理由同原因,就由得佢啦。只係今朝戰友Jack send message比我話:「美期升番200幾,金跌番」,嗯...
至於噚日吼位落場嘅恒指熊(51539),以噚日計過嘅平均買入價為$$0.112計,依家9點57分,證價做緊$0.124,賺幅為10.7%;今朝最高做過$0.144,計一計即最高賺幅為28.6%。表現都算不過不失呀。
睇埋恒指牛熊證街貨圖,牛證最貼價層26800至26899點,有相當於216張期指,但按恒指最低暫時做過26713點計,呢一層已經全數死亡,而事實上26700至26799點都不遠,故目前可以將26600至26699點視為最貼價牛證,呢度有相當於486張期指。重貨區就落到去26000至26099點,都有成910張期指,比較返近期牛證街貨計,算係咁架啦。
至於熊證方面,最貼價街貨仍然係27700至27799點,呢層亦都係重貨區,有相當於1320張期指。但同現價(10點4分報26796點)比相差成千點距離,就算今日有新熊證上市,收回價落到去27531點,但同現價都仲有接近800點差距,要殺呢層都真係有排。
依家10點8分,暫時見恒指好似企喺原位唔多郁,但如果用街貨分布嚟秤嘅話,的確再下行嘅機會係比上行嘅高,除非熊證有大量再貼價嘅新貨上市,將現時牛熊街貨中間差間收窄。恒指熊(52481),收回價27531點,新增最貼價熊證中槓桿最高,一如以往吼恒指5分鐘圖見超買時落場。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家