上個星期五(5月3日)睇中咗隻吉利(00175),仲喺[下半part]揀咗隻吉利Call(28482),只係成個下晝吉利5分鐘圖上一係上到嚴重超買,一係就喺3點40分SlowSTC(14,3)%K線同%D線落返33至46水平。基於本身呢隻Call唔係非買不可,亦唔係見到勢強死命要追,所以臨收市前20分鐘兼未殺到落嚴重超賣(正確嚟講只係一條線落咗去超賣區,另一條線係未到嘅),(28482)可以話係無靚位落場。
依家10點2分,趕頭趕命趕返公司,唔係有會要開,而係喺個市要跌成700幾點時,觀塘繞道先嚟巴士炒小巴,已經收到戰友Jack通水話塞車啦,變陣坐地鐵,只係地鐵本身要轉線之餘,落車後仲要死過去坐shuttle,咁先至可以返到公司,比起平時跳上巴士之後第四個站就落車,過返條橋就係公司樓下煩好多;更煩嘅係,恒指一下子咁向下打落去,牛熊證街貨圖下方首四層牛證全數死亡,29200至29299點變相係最貼價嘅牛證街貨,而呢度有530張期指,但相信手執牛證嘅見到今日個市咁插法,都會將貼價牛止蝕,一係就將牛證嘅收回價移後啲,一係就反手向熊證埋手。
比你你會點做?係咪覺得個市咁插法,應該都會停一停/作少少嘅技術反彈,所以就會選擇入牛證呢?呢個諗法無話你錯,作技術反彈亦都係人之常情;但當你見到恒指牛熊證街貨圖時,現價(10點16分報29265點)同下方牛證其實好近,且第三層29000至29099點呢度有1122張期指,係新嘅重貨區,同現價只係相差多265點時,仲會唔會有信心個市唔殺呢批重貨牛,而即時掉頭向上殺同現價差成800點嘅第一層熊證30000至30099點?
再睇埋恒指日線圖,上個星期五係威係勢咁升穿咗條「下降通道」嘅頂,今日又跌穿咗「下降通道」嘅底,就連條保歷加通道底(29439點)都無埋,50天線(29300點)亦已告失守,下方靠住嘅就得返條100天線(28025點)同250天線(28035點);「咦?100天線今日走嚟升穿條250天線?發出『黃金交叉』訊號?」係呀,但有咩用?事實係個市已經炒咗落去,呢兩條線依家只係變成下一個支持水平,而穿保歷加通道底之後個市點都會走返入去,但唔係即日嘅事,可能過一兩日嘅事,同時再留心保歷加通道口拓闊,即係話依家連保歷加通道都比位個市行,就算個市要走返入保歷加通道裡面,都可以唔使「走咁遠」。
唔講咁多,恒指熊(59172),收回價29748點,同現價有逾400點差距,槓桿比率約34.46倍夠做day trade。
電郵:[email protected];Weibo[下半part]:#Gladyshan#