|
熱門:

2019年4月24日 港股直擊 即巿股評

【輪證贏家】恒指熊小試牛刀

話說早排因為牙周病而做深層洗牙,此後日日都用抗敏感牙膏刷牙(姑娘比嘅,仲話唔夠問佢拎添);向來好少飲凍嘢嘅我(女生們,你懂的)噚日都抵受唔住31度高溫,終於叫咗杯凍檸茶,一飲...嘩!媽!(呢個「媽」字 實情係唔打得嘅粗口)係透心涼,但同時啲牙都痺到發癲呢,於是就嘗試細啖細啖咁一啜就吞,唔好被啖凍檸茶逗留喺個口度咁耐。

飲呢啖凍檸茶嘅難度,我諗同個市要企穩喺30000點樓上差唔多。今朝搭巴士準備落車時,恒指做完U盤,報升過百點開市,跟住喺巴士見到同事阿Jo,條友仔讀文科但依家又去走讀營養學,如果撞正佢考試考Chem嘅話就會走嚟問我呢個會考Chem只係攞E嘅理科生(呢啲咪叫攬抄囉),答完佢個問題都上到公司坐返埋位,一開電視就見到恒指升幅大為收窄,得嗰50幾點;再去pantry斟埋杯水返嚟,係呀,30000點得而復失呀嘛,好煩呀!依家9點57分,恒指做緊29997點,升34點。

本來噚日喺[下半part]時有講過話如果今日恒指有機會落到去20天線(即保歷加通道中軸)嘅話,就可以考慮Call一Call佢;日線圖所見恒指今日高開低走,粒燭掛咗喺條10天線上面(截至10點恒指做過低位29969點計,係跌穿過條10天線(30001點)嘅);至於下方SlowSTC(14,3)就仍然發出看淡訊號;但留意番,由4月8日至上星期四(18日),恒指生緊「平頂下降喇叭」呢段時間,DMI嘅ADX就keep住係30至31呢個水平;但到呢兩日恒指都keep住喺「平頂下降喇叭」頂部附近時,ADX跌穿30,依家10點9分見27.57添,ADX下行即係暗示個市無力,但倒底係無力升定無力跌?暫時未知,只知嘅係當個市無力 > 波幅細嘅時候 > 買輪就有縮Vol嘅風險。

開埋恒指牛熊證街貨圖睇,上方最貼價嘅熊證30000至30099點嗰32張期指已經做咗大市嘅早餐,再上嘅30100至30199點就有相當於398張期指,但呢個數都唔夠下方牛證29600至29699點,同埋29500至29599點呢兩層有過千張期指咁誇張,但咁重貨始終都係吸引,又難怪個市依家終於都下行殺落去食肥牛嘅。

依家10點21分,恒指跌64點,做緊29898點,咁樣一跌同下方嘅牛證又拉近一步,出手買熊嘅話就要吼分鐘圖見超買先好落場,再用隻同現價有逾500點差距嘅恒指熊(59271),收回價30488點(30000點失而復得你都會止蝕啦,揀遠啲啦),呢一刻成交雖然唔太活躍,但憑住佢槓桿比率約40倍,同一收回價中最高,兼低街貨呢兩個條款上嘅優點,食得出就得架啦,唔係咩?

【輪證贏家】寫埋今日就停啦,[下半part]都係一樣,因為小妹又係時候要清一清假啦,順個便同我家老爺外遊放攰同放電,再返嚟嘅時候就係「五月窮」嘅開始,5月2日再見!呢段時間大家要加油呀!

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。