美國國債孳息率回落，美股繼續強勢反彈，道指隔晚急升近400點，其餘兩大指數亦升逾1%。港股喺夜期跟ADR已先偷步炒上，今日恒指高開292點，一度高見31799點，逼近整個跌浪反彈黃金比0.618，升勢告一段落，其後升幅逐步收窄，更曾倒跌最多102點，低見31396點，中午恒指報收31544點，升45點；國指則隨A股下跌，報收12759點，跌74點。
港股高開低走，情況有啲不妙，不過由29200點展開反彈，累計反彈超過2000點，喺收復多條移動平均線後稍作整固亦唔過分，況且重磅股業績排住隊，明日港交所(00388)跟銀娛(00027)派成績表後，重磅股業績最快要3月中過後，大市亦無必要一條氣直上，好似之前收復100日線及50日線後，都要喺該水平上落打底，目前情況亦類似。
友邦(01299)派成績表純利按年增長近47%，派息亦按年增加17%，派完成績表大行繼續唱好，股價今日升逾4%。至於中午派成績表嘅渣打(02888)，建議恢復派息，股價亦有一定支持，不過股價暫時喺94元之前止步，要睇吓大行對呢份成績表有乜嘢反應。至於其他銀行股則回軟，但跌幅尚算溫和。至於騰訊(00700)今早高開低走，連續幾日都係咁款，睇落有啲唔開胃，不過下跌裂口已補回，暫時喺450元水平作整固，呢幾日整固成交減少，沽壓唔算大。
港交所(00388)昨日急升後今日有回調，明日派成績表肯定報捷，只係昨日急升某程度上已反映業績理想預期，要突破前高位有難度，但加快落實改革上市制度，今年業績料可勝舊年，買股買預期，阿Man對港交所後市仍有信心。
「股神」畢非德指佢本人一日未更換蘋果手機，代表市場仍未飽和，接受訪問表示近日買入最多股份亦係蘋果，而今年蘋果秋季又推出新款手機，刺激其股價隔晚升近2%，帶動相關手機設備股做好。不過阿Man認為之前錯過低位買入相關股份，喺近日該批股份累積大量升幅之下，現價再追貨值博率已不高，一於採取食花生態度面對，有平貨可以分段食糊，無貨再追亦無謂。
留意新股賓仕國際或熱炒
近日市場熱炒半新股同新股，大部分半新股都錄得不俗升幅，不如留意正在招股嘅賓仕國際(01705)。賓仕除經營知名品牌「天仁茗茶」連鎖茶飲業務外，亦從事食品分銷代理業務，主要產品包括日本UHA味覺糖、新東陽等，亦獲得徹思叔叔、Hotel Chocolat及九湯屋嘅特許經營權。由於分銷業務收入穩定，而零售業務則快速增長，公司將繼續並駕齊驅，不打算放棄分銷業務。
值得注意係今次公司發行1億股新股，其中九成為國際配售，僅餘下1000萬股作IPO，招股價介乎0.8元至1元，呢啲晒士最啱炒鬼，加上IPO數量唔多，估計上市後有一番炒作。
麥狄文
(徐狄怡‧證監會持牌人)
