美國4月份核心通脹按年計創3年新低，市場對減息預期再度升溫，聯儲局9月減息機會增至八成。隔晚美股顯著造好，三大指數收市齊創歷史新高。至於港股今早黑期已升越19300水平，高開後升幅雖曾縮水，但阿爺繼續撐內房，除有消息指要求地方政府買入未售樓盤外，亦促銀行提供支持，提振市場信心。
港股今早高開189點，報19262，升幅曾縮至40點，見19114半日低位，低位有買盤吸納，加上阿爺又出招撐市，大市重拾動力再升。中午收市前，最多升323點，高見19397，創去年8月7日超過9個月高位。恒指半日升303點或1.6%，報19376；國指升122點或1.8%，報6864；科指半日升43點或1.1%，報4084。半日成交額激增至1142億元，有資金追貨之餘，唔排除有沽空倉冚倉打靶。
騰訊(00700)跟阿里(09988)分別於假期前公布季績，兩者股價表現榮辱互見，騰訊盤中曾破400元關，見超過一年高位，但其後升幅收窄，但仍升逾4%，半日收報397.8元。騰訊若非受限內地政策，其實係有實力成為全球最頂尖科企，無奈內地政策窒礙其發展，持有大量現金唯有以股份回購去回饋股東，執行超千億股份回購。
至於阿里，上季經調整純利按年倒退一成，電商面對同業競爭，仲有帶貨平台衝擊，生意難做，公司分拆計劃又無晒影，業績前炒上一段，業績未能令市場收貨，股價今日回吐亦正常。阿里目前只有一個理由仲令到資金不捨，就係估值仍然叫平，但呢個理由唔足以令到阿里股價可以長升長有。至於其他科技股普遍隨大市向上，美團(03690)半日升3.12%，京東(09618)今日公布業績前再升逾2%，只有小米(01810)跌0.2%。
金融股造好，大笨象(00005)半日升1.31%，重上70元水平；港交所(00388)半日升1.6%，跟300元水平只有一步之遙。友邦(01299)半日升1.35%，平保(02318)則升逾半成。其他內銀股續有資金追捧，升幅閒閒地4%以上。再有傳聞阿爺要撐內房，今次係要直接出手去庫存，話要由地方政府買斷過百萬套空置房，但全國幾百萬套空置房，阿爺真係可以買得斷全部?? 呢點阿Man有保留，始終要由市場力量去決定內地樓市前景。
不過內房物管股再落鑊，融創(01918)升13.5%，世茂(00813)更急升近三成，龍湖(00960)飆升13.2%為表現最佳藍籌，華潤置地(01109)升3.6%，遠洋(03377)爆升48.7%，中國海外(00688)揚5.6%，萬科(02202)勁升一成四。碧服(06098)升6.6%，世茂服務(00873)大升18.6%。
美國大幅調高進口電動車關稅至100%，電動車股受壓，比亞迪(01211)跌1.1%，理想汽車(02015)跌3.8%，蔚來(09866)跌0.6%，零跑汽車(09863)跌1%，只有小鵬(09868)揚1.3%。
港股今日再升，唔計上月低位16000水平起步，以月初低位17600水平起步計，已升1800點，月波幅實已足夠，不過阿爺擺明車馬要托市，大市高居不下，即使嚴重超買，亦可以高位震盪代替回調。暫時唔估頂，反正要大回調嘅話，自然會有訊號。持貨者可坐定定，但未有貨喺手，呢啲水平相當接近由去年高位22700回調至今年初低位14800水平嘅反彈黃金比0.618，即19600至19700水平阻力，寧願等回調，再搵個位上車。
麥狄文
(徐狄怡‧證監會持牌人)
