美國對華制裁繼續，拜登進一步限制對華輸出晶片，晶片股低開拖累美股，美股三大指數先跌後回穩。道指收市升13點，標指跌不足1點，幾乎持平，納指跌34點。標指暫時喺4300至4400之間徘徊，VIX守住17，未見進一步回落，預期美股喺議息前表現仍然較為反覆。至於港股，美國輸華晶片限制將加辣，一度拖低恒指失守10天線(17699)及20天線(17655)，不過內地公布上季GDP增長好過預期，兩線失而復得，大市表現反覆。
恒指低開45點，跌幅一度擴大至147點，見17625半日低位，不過內地第三季GDP好過預期，大市反彈兼回升，最多升57點，見17831半日高位，可惜17800至17900阻力唔細，加上欠缺成交配合，上升動力有限，半日都係跌市收場。恒指跌18點，收報17755；國指報6093，幾乎持平；恒科指則跌46點，收3789。半日成交額441億元。
由於美國對華加強晶片制裁措施，隔晚AI晶片龍頭股輝達（Nvidia）一度跌逾7%，其後收窄跌幅，但仍要跌近半成，所以今日港股呢邊嘅科網股表現亦偏軟，百度(09888)半日跌3.5%，京東(09618）亦跌3.2%；騰訊(00700)跟美團(03690)跌0.8%，阿里(09988)靠穩微升0.1%，攜程(09961)則跌0.4%。
最勁係小米(01810)，保持升勢，半日再升0.6%。小米呢期強勢，阿Man試從公司發展電動車角度去諗，要加入電動車嘅激烈競爭市場，資本雄厚係好重要，由於Tesla掀起咗減價戰，要做到仲有錢賺就只有靠薄利多銷，產量取勝，小米要喺呢個市場搵食，唔排除推高股價嘗試喺市場集資，咁股價至少推一波上去15至20元再喺市場抽水，先有能力競爭，呢個係小米相對其他科網股強勢嘅原因。
金融股個別發展，國家隊入過場嘅板塊，內銀股即使有回調，幅度亦有限，平保(02328)半日就跌0.6%。至於港隊金融股代表，港交所(00388)半日跌0.5%，但友邦(01299)跟大笨象(00005)分別升0.1%及0.4%。
比亞迪(01211)發盈喜，半日炒高8%，為表現最好藍籌股，亦帶動其他汽車股造好，長城(02333)、吉利(0175)及廣汽(02238)半日分別升3.9%、1.8%及1.1%。三傻亦有隨比亞迪造好，蔚來(09866)升1.8%，理想(02015)升2.9%，小鵬(09868)則升0.2%。
不過較受市場睇好嘅生科股，今日普遍受壓，藥明生物(02269)跌4.7%，同系藥明康德(02359)跌2.1%；國藥(01099)跌1.7%，石藥集團(01093)跌1.4%，翰森製藥(03692)跌0.9%；其他生科股半日跌超過2%至近7%不等。另外，內需股今日續升，但噚日同上星期威過一陣嘅聯想(00992)今日表現極差，失守上周突破起步位8元水平，半日跌7.3%，係表現最差藍籌股，一下就打回原形，上個星期嘅升勢化為烏有。
港股雖然有內地優於預期嘅GDP助攻，可惜缺乏成交支持，升勢無以為繼，暫時仍守10天及20天線，17600水平不容有失，失守或有機會下破17300水平再探底。
麥狄文
(徐狄怡‧證監會持牌人)
