美股隔晚假期休市，歐洲股市高開低走，略為倒跌收市，原因係歐債息回升。美元保持強勢，美匯指數回升至104.1，美元強勁新興市場理應走弱，不過阿爺周末期間使出組合拳，令人民幣一度回升至7.255水平，不過喺美元強勢下，無奈再落至7.27-7.28水平左右，暫時人民幣仍然喺7.25至7.3水平游走，暫難擺脫弱勢上落。加上今早內地公布財新中國8月服務業PMI遠差預期，中港兩地股市齊齊腳仔軟，港股暫守18500水平，20日線(18451)近在咫尺，失守18500料考驗20日線。
恒指低開126點，跌幅失略收窄至118點，見18725半日高位，但財新數據公布後，大市跌幅擴大，一度跌318點，見半日低位18525，但18500仍守，有不俗支持。半日恒指報收18559，跌284點；國企指數半日跌95點，收6437；科指收4240，跌64點。半日成交額507.46億元，話就話今日回吐成交減少係好事，反映沽壓有限，但成交又縮水，唔排除係噚日急升淡友回補空倉後，今日無晒動作，又去返買賣兩閒局面，港股繼續拍烏蠅。
藍籌股普遍偏軟，重磅科網股跟金融股幾乎全線下跌，港交所(00388)跌0.6%算跌得少，大笨象(00005)跟友邦(01299)分別跌1.5%及2.9%，噚日升市佢哋升唔起，今日跌市就齊齊落，呢期嚟講表現都算弱雞。內銀跟內險股亦見回吐，平保(02318)半日跌2.7%，建行(00939)則回1.2%。至於科網股全線向下，美團(03690)、騰訊(00700)、百度(09888)、網易(09999)跟京東(09618)全部跌逾1%，阿里(09988)半日跌不足1%，多得阿里雲計劃上市嘅消息頂住。
至於內房股噚日急升過後，今日回吐都正常，不過多隻被踢出港股通嘅內房股初拋售，今日跌到一仆一碌，其中港龍中國地產(06968)、正商實業(00185)跟弘陽地產(01996)半日重創三成或以上，德信中國(02019)半日更跌近四成，成為半日跌幅最大個股。反而噚日急升嘅融創(01918)再獲納入港股通，半日再升近17%。
除咗被踢出港股通嘅內房股急跌，被踢走嘅生科股，同樣無好下場，維亞生物(01873)半日跌7.7%，三葉草(02197)半日跌逾一成，其他生科股偏軟，均隨大市回落。比較標青嘅板塊係火電股，不過都係無啦啦短炒，呢啲股追入十追九伏，眼看手勿動。
雖然阿爺出晒組合拳，但中港兩地股市能否扭轉弱勢回升，仍需靠資金流入，但暫時未見有新錢流入市場，短期難以扭轉劣勢。19000至19200點為短期極大阻力位，噚日挑戰50日線不果，一但再向下失守18500及20日線，至於10日線(18272)將會係好友最好一道防線，失守後唔排除再展開新一輪跌浪。
麥狄文
(徐狄怡‧證監會持牌人)
